DILI, 13 Fevereiru 2025 (TATOLI)—Primeiru-Ministru (PM), Kay Rala Xanana Gusmão, hateten, iha tempu udan ne’e rezulta estrada barak iha Timor-Leste kondisaun aat tanba problema rai ne’ebé la sólidu.
“Ita iha problema boot kona-ba estrada, foin lalais ha’u ba iha Ermera ema hotu ezije estrada kondissun la di’ak, maibé ita-nia problema iha ita-nia rai ne’ebé fraku tebes, ita-nia rai ladun sólidu. Temi sólidu ne’e ita kompara Subaun ho Karimbala, bainhira udan tau makaas Subaun metin tebes rai la halai, maibé Karimbala foin udan uitoan rai ho fatuk tun dala ida taka estrada, ne’e rai la metin, nune’e mós iha fatin seluk,” Xanana hateten ba jornalista sira iha Palásiu Prezidensiál Nicoloau Lobato, Bairru Pite, kinta ne’e.
Tuir observasaun ne’ebé iha, nia dehan, estrada barak labele auguenta to’o tempu naruk tanba rai fraku tebes, rai ladún ka’er malu metin, nune’e iha tempu udan fó impaktu tebes ba estrada sira.
“Iha parte tetuk nian mós hanesan, área balun rai fraku estrada nia durasaun la naruk, maibé parte barak mós rai forte tebes. Ita bele haree de’it estrada diresaun Komoro sa’e ba Aileu nian, tempu bailoro estrada ne’e toos la-halimar, eskavatór baku mós la monu. Maibé iha tempu udan foin tau bosok, rai ho fatuk tun dala ida, ida ne’e mak problema boot ne’ebé ita hasoru,” nia tenik.
Nia hatutan, ho problema sira-ne’e hotu Governu sei buka meiu hotu hodi rezolve ho estudu ne’ebé di’ak, nune’e labele fó impaktu ba movimentasaun populasaun sira iha territóriu hotu.
Iha parte seluk, kona-ba mota husi estrada ligasaun Dili-Aileu iha parte bee-tudak nian ne’ebé tempu udan fó impaktu ba movimentasaun populasaun sira-nian Governu planeia ona atu konstrui ponte ida ho kualidade.
“Iha sa’e ba bee-tudak nian problema duni, maibé Governu haree hela atu halo ponte ida, maibé nia ladun luan, ba de’it kareta ida. Se kareta ida sa’e husi Dili ba haree ida tun husi Aileu mai, nia tenke para lai, husik ida liu tiha mak nia foin bele liu fali, ida-ne’e ita sei haree,” nia dehan.
Jornalista : Hortencio Sanchez
Editór : Cancio Ximenes
