OEKUSI, 24 Fevereiru 2025 (TATOLI)– Diretór Diresaun Rejionál Infraestrutura, Remígio Nunu Sila, informa kona-ba problema estrada foun ne’ebé foin loke iha 2023 iha aldeia Oébaha, suku Bobometo bá aldeia Bitopa, suku Usitasa’e perténsia sub-rejiaun Oésilo, entegra ona ba Konsellu Administrasaun Fundu Infraestrutura (KAFI) rejionál atu rezolve tanba daudaun estrada referida nakonu ho tahu.
“Ita haree kuandu udan para uitoan parte IGEADI, I.P bele rezolve ou bele enkaixa mós iha planu KAFI rejionál, hanesan daudaun implementa ona projetu emerjénsia sira balun,” dehan Remígio Sila, iha Oekusi, ohin.
Notísia relevante:Reabilitasaun estrada Oébaha-Bitopa laiha kualidade
Estrada foun ne’e loke iha 2023, ladun iha kualidade tanba fui sementu ba de’it subida enkuntu rai tetuk tau de’it rai no rai henek, nune’e iha tempu udan afeta rai tahu maka’as.
“Ekipa monitorizasaun sai ona iha semana kotuk tanba udan bo’ot, ne’ebé estrada ne’e nakonu ho tahu tanba iha konstrusaun kompañia la konsege fui sementu rabat ho beton ka plan-konkrit ne’e sira tau de’it iha fatin ne’ebé subida de’it, maibé rai tetuk la tau no la tama iha BoQ ho dezeñu, entaun prezudika rai tahu mak’as hanesan ita haree daudaun,” nia dehan.
Notísia relevante:RAEOA reabilita estrada rejionál Oebaha liga ponte Bitopa ho kustu rihun $544-resin
Antes ne’e, Xefe aldeia Oébaha, Marcelino Ole, konsidera projetu ne’e laiha kualidade tanba empreza konstrui pedasuk de’it no fui sementu mihis liu hodi provoka rai-rahun, nune’e bainhira tempu udan sei danifika fali obra ne’e.
“Estrada husi Paut bá Bitopa nia kualidade ne’e ladi’ak, tanba sira nahe ne’e pedasuk-pedasuk de’it. depois nahe sementu mihis liu no rai-rahun maka’as, ne’ebé ha’u husu ba Obra Públika atu bolu kompañia konstrutora ne’e asellera dalan ne’e, tanba agora Outubru. Kuandu tama Novembru udan ona, sei fó impaktu ba komunidade, tanba bee-dalan laiha sei estraga mós estrada ne’e”, nia lamenta iha tinan kotuk (2024).
Rekorda katak projetu ne’e autoridade RAEOA lideradu Arsénio Paixão Bano, hatuur fatuk dahuluk iha loron 18 Jullu 2023, ho distánsia kilómetru 7,2. Empreza Irmão Timor mak ezekuta ho valór kontratu $544.055,33. Verba ne’e autoridade RAEOA aloka husi Orsamentu Jerál Estadu (OJE) 2023 ho nia durasaun servisu fulan sia, hahú iha Jullu 2023 to’o Marsu 2024.
Notísia relevante:Irmão Timor ezekuta estrada rejionál hosi Oébaha ba Bitopa atinje 8%
Jornalista: Abílio Elo Nini
Editór: Florencio Miranda Ximenes
