OEKUSI, 11 Marsu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Infraestrutura (DRI), hamutuk ho lia-na’in sira iha bairru Huabanais hala’o seremónia kulturál, molok reabilita estrada rurál iha aldeia Sabén, suku Bobometo, sub-rejiaun Oésilo.
Projetu reabilitasaun estrada rurál ne’e komesa husi Bokobeno to’o Oésilo sentru ho distánsia kilometru 7, ne’ebé ezekuta husi kompañia Fifna Unipesoál Lda ho medida estrada nia luan metru 8 no daudaun kompañia seidauk selebra kontratu ho Autoridade RAEOA kona-ba valór orsamentu.
Biban ne’e, Diretór Diresaun Rejionál Infraestrutura, Remigío Nuno Sila, hateten objetivu husi serimónia rituál ne’e atu husu matak malirin ba beiala sira no rai-na’in sira, nune’e hafasil ezekusaun projetu reabilitasaun ne’e ho susesu.
Notísia relevante:KAFI Rejionál sei buka solusaun ba problema reabilitasaun estrada Oébaha bá Bitopa
“Ohin inisíu loke dalan atu hahú servisu iha terrenu tanba kompañia hetan orden servisu husi loron 05 Marsu 2025, oinsa sira halo preparasaun no mobiliza ekipamentu materiál sira mai iha terrenu, nune’e sira bele implementa ona projetu emerjénsia ne’ebé mak ita fó ona orden servisu ba sira,” Remigío Nuno Sila, dehan iha Oésilo, ohin.
Tan ne’e, nia husu ba komunidade sira aldeia Sabén liuliu bairru Huabanais mai to’o Kabun atu koopera ho kompañia konstrutsaun iha ámbitu implementasaun projetu referidu, tanba problema kona-ba rai no ai-horis, ekipa konjunta mai verifika ona hodi integra iha planu orsamentu hodi halo indemnizasaun iha futuru.
“Importante mak kooopera tanba imi-nia rikusoin saida de’it, ami sei rejista no prosesu Governu sei kle’ur, ita bele selu iha tinan ne’e no bele tinan oin,” nia fó hanoin.
Iha biban ne’e, Xefe Aldeia Sabén, Abílio Ili, reprezenta komunidade aldeia Sabén hato’o agradesimentu ba Governu tanba estrada rurál ne’e foin mak dahuluk Governu reabilita, nune’e atu fasilita komunidade no transporte sira asesu ho seguru.
“Ami sei koopera tanba estrada ne’e di’ak mai ami atu utiliza ba ami-nia moris, kona-ba estraga ai-oan no rai, ami rona ona informasaun husi terra propriedade no agrikultura sei mai rejista, ida-ne’e mak presiza kolaborasaun, ami la taka no la impede, kuandu Governu presiza medida rai ne’e metru 12, ami prontu apoia. Tanba estrada ne’e benefisia ba uma-kain 290 iha Sabén ” nia orgullu.
Martinho Liu, nu’udar lia-nain husi bairru Kabun, rekomenda atu reabilita tenke garantia kualidade tanba Governu gasta osan bo’ot entaun dalan ne’e tenke di’ak, labele hanesan estrada sira seluk, halo seidauk to’o hotu komesa aat fila-fali.
“Reabilitasaun estrada rurál ne’e presiza nahe ho simentu, tanba dalan husi Huabanais tama to’o Kabun atu sa’e ba Oésilo sentru kuandu tempu udan rai tahu maka’as, kuandu reabilita mak aterru de’it ho rai ba futuru sei hetan estragu, tanba ne’e sujere presiza nahe ho simentu ho kualidade,” nia rekomenda.
Nia mós propoin ba kompañia atu hadi’a subida Banat ne’ebé durante ne’e fó perigu ba transporte sira tanba bainhira karreta ho pasajeiru mai to’o fatin ne’e tenke tuun la’o ain ho distánsia do’ok.
Notísia relevante:Tinan ne’e, PNDS Oekusi implementa projetu 25 ho kustu rihun $900-resin
Jornalista: Abílio Elo Nini
Editór: Florencio Miranda Ximenes
