OEKUSI, 26 Fevereiru 2025 (TATOLI) – Tuir Planu Asaun Annuál (PAA) 2025, Programa Nasionál Dezenvolvimentu Suku (PNDS) sei implementa projetu hamutuk 25 ho kustu rihun $900-resin iha Rejiaun Administrativa Espesiál Oekusi Ambeno (RAEOA).
Projetu PNDS 25 ne’ebé implementa iha 2025 ne’e ba suku 18 maioria projetu reabilitasaun estrada rurál tanba estrada mak sai problema esensiál iha Oekusi.
Notísia relevante:PNDS Oé-Cusse sei devolve rihun $200 ba kofre Estadu
“Ha’u hanoin projetu estrada mak barakliu hanesan reabilita edifísiu no halo irrigasaun. Kona-ba projetu bee-moos tinan ne’e laiha,” nia dehan ba Ajénsia Tatoli, I.P iha Oekusi, ohin.
Projetu hirak-ne’e tuir planu globál nian ne’e katak sei hahú implementa iha fulan Maiu 2025, bainhira tempu bailoron, maibé kuandu transférensia orsamentu husi Governu Sentrál mai iha Marsu sei hahú iha Abríl.
“Projetu hirak-ne’e propoin direita husi suku no aldeia, nune’e PNDS só simu de’it proposta hodi submete ba nasionál atu hetan aprovasaun hodi implementa iha tinan ida nia-laran,” nia relata.
Entretantu, projetu 25 ne’e kabe ba suku 18 la inklui suku foun rua Kutete no Monemeko, mak hanesan iha sub-rejiaun Nítibe, suku Ban-Afi halo reabilitasaun estrada iha aldeia Hautefo no aldeia Kuanobe, iha suku Bene-Ufe halo konstrusaun irrigasaun iha aldeia manán no reabilita edifísiu ba eskola primária.
Iha suku Lela-Ufe halo reabilitasaun ba estrada rurál iha aldeia Mahata, suku Suni-Ufe halo reabilitasaun estrada rurál iha aldeia Kabana no reabilita kapela iha aldeia Oélnanoe, suku Usitako, halo konstrusaun foun edifisíu moru haleu eskola, no konstrusaun moru haleu kapela iha aldeia Nítibe.
Iha sub-rejiaun Oésilo suku Bobometo halo reabilitasaun estrada rurál iha aldeia Oénoah, suku Usitaqueno halo reabilitasaun estrada rurál iha aldeia Níbin, iha suku Usitasa’e halo reabilitasaun edifisíu kapela iha aldeia Buqui.
Iha sub-rejiaun Pante Makasar, suku Bobokase halo reabilitasaun estrada rurál iha aldeia Fatubijae, no aldeia Nusla’o halo konstrusaun moru protesaun ba edifisíu kapela. Iha suku Costa halo reabilitasaun estrada rurál iha aldeia Sanane, suku Cunha halo reabilitasaun edifisíu eskola primária iha aldeia Noafafo.
Iha suku Lalisuk halo reabilitasaun estrada iha aldeia Banoko, suku Lifau halo reabilitasaun estrada iha aldeia Oémolo, suku Naimeko halo reabilitasaun estrada iha aldeia Noque no reabilita mós kapela, suku Nípani halo reabilitasaun estrada rurál iha aldeia Bausiu, iha suku Taiboko halo reabilitasaun iha estrada rurál iha aldeia Hauboni.
Iha sub-rejiaun Pássabe, suku Abani halo reabilitasaun estrada iha aldeia Pássabe, suku Malelat halo reabilitasaun edifisíu postu saúde Malelat no halo mós konstrusaun foun ida.
Kona-ba suku foun rua Kutete no Monemeko, seidauk integra iha planu PNDS tinan ne’e, maibé sei hetan apoia direitamente husi Ministériu Administrasaun Estatál.
“Ami simu ona orientasaun husi ministru, atu hala’o enkontru ho autoridade lokál eleitu sira, hodi deskuti, sira-nia prioridade mak saida, depois sei submeter nasionál, tanba orsamentu ne’e sira sei hetan husi MAE,” nia informa.
Notísia relevante:PNDS Oé-Cusse implementa ona projetu iha suku 18
Jornalista: Abílio Elo Nini
Editór: Florencio Miranda Ximenes.
