DILI, 23 Jullu 2025 (TATOLI)-Prezidente Tribunál Rekursu (PTR), Afonso Carmona, hili nonok, la hatán ba pozisaun Ministra Saúde (MS), Elia dos Reis Amaral, ne’ebé la kumpre desizaun Tribunál Rekursu (TR) sobre inskonstitusionalidade sirkulár ne’ebe bandu Profisionál Saúde (PS) sira halo prátika depois oras-servisu.
“Ha’u labele komentáriu ba desizaun ne’ebé ema deside ona loos ka la’e. Ha’u labele ko’alia ba ida-ne’e”, Afonso Carmona hatete iha edifísiu TR, kuarta-ne’e.
Nia dehan, kazu konkretu la’o hela, tanba iha regra prosesuál, por-ezemplu ema ne’e la simu desizaun Tribunál Rekursu, entaun nia bele halo iha rekursu estraordináriu. “Tanba ne’e, ha’u labele komentáriu ba kazu ida-ne’e”.
Notísia relevante: MS sei mantein karta sirkulár bandu médiku hala’o prátika iha klinika privadu
Carmona mos afirma, nia parte la apoiu ba deklarasaun ka opiniaun hosi Ministra Saúde nian ne’ebé mak ignora akordaun TR nian. “Ha’u la apoiu nia (ministra) opiniaun, tanba ne’e desizaun tribunál nian, ita labele apoiu fali ema nia opiniaun, nia la kumpri Tribunál Rekursu nia ezekusaun ne’e buat seluk ida”.
Carmona esplika, Tribunál Rekursu laiha prazu ba Ministra Saúde atu kumpre akordaun ne’ebé fó sai ona. Tanba, desizaun ne’e bazea ba pedidu husi Provedoria Direitu Ema-nia no Justisa (PDHJ, sigla portugés) mai Tribunál Rekursu hodi husu halo fiskalizasaun abstrata ba sirkulár Ministra Saúde nian no tribunál deklara ona inkonstituisionál ba sirkulár ne’e.
“Nia (ministra) la kumpri tanba aktu polítiku. Ita ko’alia aktu polítiku ne’e, ha’u labele esplika to’o iha ne’eba. Fiskalizasaun abstrata ne’e atu haree desizaun iha ligasaun ba ona armonizasaun lei.Tan ne’e mak deklara inskonstituisional. Ne’ebe ha’u labele komentáriu ba desizaun tribunál”, nia konklui.
Rekorda fali katak PDHJ, Virgilio Guterres, simu notifikasaun konaba akordaun husi TR ligadu pedidu fiskalizasaun abstrata kona-ba sirkulár MS hodi bando Profisionál Saúde (PS) sira hala’o servisu iha klínika privadu tuir dekretu lei númeru 13/2012, 7 Marsu no alterada ho dekretu lei númeru 86/2022, 14 Dezembru ne’e inkonstitusionál.
Maibé, Ministra Saúde, Elia Dos Reis Amaral, hatete sei la dada nia karta sirkulár ne’ebé mak bandu médiku sira hala’o prátika iha klínika privadu sira, tanba maioria médiku sira ne’ebé mak hala’o knaar iha klínika privadu ne’e investimentu husi Estadu liuhusi Ministériu Saúde nian.
Notísia relevante: MS presiza alternativa seluk regula dupla funsaun iha setór saúde
Jornalista : Natalino Costa
Editora : Rita Almeida
