DILI, 23 Jullu 2025 (TATOLI) – Komisaun F iha Parlamentu Nasionál trata asuntu Saúde, Igualdade Jéneru no Inkluzaun Sosiál, rekomenda ba Ministériu Saúde (MS) atu haree mekanimzu seluk hodi regula pesoál saúde ne’ebé halo prátika iha klínika privada sira.
Prezidente Komisaun F, Maria Gorumali Barreto, fó sujestaun ne’e relasiona ho sirkulár husi Ministra Saúde, Élia dos Reis Amaral, ne’ebé bandu pesoál saúde atu pratika iha klínika privada no hanorin iha universidade sira. Tanba tribunál halo apresiasaun ba sirkulár ne’e katak inkonstituisionál.
Nune’e, nia husu ministra atu kumpre desizaun ne’e, maibé presiza haree meiu seluk hodi regula pesoál saúde ne’ebé halo dupla funsaun, maski ezerse knaar no responsabilidade hanesan ajente Estadu.
“Labele uza tempu barak liu iha klínika privada no labele utiliza fali ekipamentu Estadu nian ba iha klínika privada”, deputada ne’e preokupa.
Nia observa katak dalaruma pesoál saúde tama iha ospitál, maibé seidauk to’o oras sai ona. “Ida-ne’e mak irregularidade, tanba ne’e ministra hasai sirkulár hodi regula, maibé tribunál hasai ne’e inkonstituisionál”, salienta.
Kestiona kona-ba bein-estar pesoál saúde nian, deputada ne’e hateten katak ba kestaun ne’e presiza haree mós, maibé parte ida nesesita haree, maibé médiku sira maioria uza osan Estadu ba hasai sira-nia espesialidade. Nune’e presiza iha konxiénsia rasik, jere tempu, disiplina no hala’o knaar ho didi’ak.
Tuir fiskalizasaun komisaun nian, bainhira pesoál saúde halo serbisu iha fatin seluk afeta ba atendimentu pasiente sira, tanba la foku serbisu iha ospitál. “Ida-ne’e kestaun séria, ita presiza tau atensaun”, nia afirma.
Notísia relevante: Desizaun tribunál aas liu sirkulár, deputadu Joaquim husu MS atu kumpre
Jornalista: Nelson de Sousa
Editora: Maria Auxiliadora
