DILI, 21 Jullu 2025 (TATOLI) – Knaar jurisdisionál prevee ona iha Konstituisaun artigu 118, katak desizaun ne’ebé tribunál sira fó ona tenke halo tuir duni no soi kbiit aas liu desizaun autoridade sira seluk nian.
Tanba ne’e, lejisladór no deputadu membru komisaun A iha Parlamentu Nasionál ba Asuntu Justisa no Konstitusionál, Joaquim do Santos ‘Boraluli’, konsidera dezisaun hotu-hotu ne’ebé autoridade judisiál fó sai mak boot liu buat hotu iha país ne’e.
Deklarasaun husi deputadu ne’e relasiona ho sirkulár husi Ministra Saúde (MS), Élia dos Reis Amaral, ne’ebé bandu pesoál saúde atu pratika iha klínika privada no hanorin iha universidade sira. Tanba tribunál haree no halo apresiasaun ba sirkulár ne’ebé ministra hasai katak inkonstituisionál.
Nune’e, Joaquim Boraluli husu ba Ministra Saúde atu kumpre desizaun Tribunál Rekursu ne’ebé hatún ona akórdaun kona-ba sirkulár ne’ebé fó sai.
“Se tribunál deklara katak desizaun [administrativa husi Governu] sai ba norma viola Konstituisaun ka inkonstitusionalidade, entaun [desizaun] ne’e labele aplika. Tenke dada fali husi vijénsia ne’e”, nia afirma.
Deputadu ne’e salienta katak akórdaun tribunál nian hasai ona katak desizaun administrativa ho efeitu nulu.
Rekorde katak, iha 11 Jullu, Tribunál Rekursu notifika Provedoria Direitu Umanu no Justisa (PDHJ, siglá portugés), kona-ba sirkulár ne’ebé Ministra Saúde hasai antes ne’e. Tribunál haree no halo tiha apresiasaun ba sirkulár ne’ebé ministra hasai hodi bandu pesoál saúde halo atividade iha fatin seluk. Maibé, tanba la kontra norma jurídika rejime espesiál profisionál maka kontinua autoriza profisionál saúde halo sira-nia serbisu ho forma livre.
Notísia relevante: https://tatoli.tl/2025/07/16/ms-sei-mantein-karta-sirkular-bandu-mediku-halao-pratika-iha-klinika-privadu/
Jornalista: Nelson de Sousa
Editora: Maria Auxiliadora
