Komunidade Tailándia selebra Liurai Maha Vajiralongkorn nia aniversáriu ho asaun karidade

DILI, 08 Jullu 2026 (TATOLI) – Embaixada Tailándia no komunidade tailandeza ne’ebé hela iha Timor-Leste komemora ohin aniversáriu Liurai Maha Vajiralongkorn ba da-74 ho atividade karidade ida iha Kantina Matak, ne’ebé lokaliza iha Palásiu Prezidensiál, Dili.

Objetivu husi selebrasaun ne’e atu hametin Programa “Dapur ba Povu”, inisiativa ida husi Prezidénsia Repúblika, José Ramos-Horta, ne’ebé dezeña atu kombate má nutrisaun infantíl no apoia família vulneravel sira.

Inisiativa ne’e inklui fornesimentu hahán no ekipamentu desportu nian ba labarik sira ne’ebé hetan benefísiu hosi programa ne’ebé promove ona husi Xefe Estadu dezde Dezembru 2022, hanesan parte ida husi esforsu sira hodi apoia komunidade ne’ebé vulneravel liu.

Prezidente Repúblika, José Ramos-Horta, destaka amizade no kooperasaun istórika entre Timor-Leste no Tailándia, hodi fó parabéns ba Liurai Maha Vajiralongkorn ba nia aniversáriu no dezeja saúde di’ak ba Família Reál no prosperidade ba povu Tailándia.

“Onra ida partisipa iha inisiativa sira ne’ebé organiza husi Embaixada Tailándia. Ami hato’o felisitasaun ba Majestade nia aniversáriu no reza ba nia saúde, saúde Família Reál tomak, no ksolok ba povu Tailándia”, nia dehan.

Ramos-Horta nota katak Programa “Dapur ba Povu” halo parte iha série inisiativa sosiál ne’ebé Prezidénsia Repúblika promove hodi komplementa Programa Governu nian ne’ebé dirije ba família sira ne’ebé vulneravel liu, liuhusi fornesimentu hahán, empoderamentu ekonómiku feto nian, no hadi’a kondisaun uma nian.

Xefe Estadu agradese ba Embaixada Tailándia no komunidade tailadeza nia kontribuisaun ba programa ne’e, hodi haree katak doasaun ne’e reprezenta jestu amizade no solidariedade entre povu rua ne’e.

Ramos-Horta destaka mós katak relasaun entre Timor-Leste no Tailándia harii ona durante liu dékada rua, liuhusi kooperasaun iha área oioin, inklui agrikultura, edukasaun, saúde, no dezenvolvimentu rurál.

Ramos-Horta fó hanoin katak xefe suku balun husi Timor-Leste mós hetan formasaun iha Tailándia iha área sira ne’ebé iha relasaun ho agrikultura no dezenvolvimentu komunitáriu, enkuantu Família Reál Tailándia nian apoia ona projetu sira iha setór edukasaun no saúde iha Timor-Leste.

Nia destaka mós partisipasaun husi pesoál militár no polísia Tailándia nian iha misaun sira manutensaun pás nian iha Timor-Leste, nomós apoia ba prosesu adezaun nasaun nian ba ASEAN.

Aleinde ne’e, Ramos-Horta dehan estudante timoroan barak maka hetan ona oportunidade atu estuda iha universidade oioin iha Tailándia, hodi hametin lasu kooperativu sira entre nasaun rua ne’e.

Embaixadór Tailándia iha Timor-Leste, Atipat Rojanapaibulya, afirma katak inisiativa voluntáriu ne’e organiza hodi kontribui ba moris di’ak labarik timoroan sira-nian no hodi marka aniversáriu Liurai Maha Vajiralongkorn, ne’ebé selebra iha loron 28 fulan-Jullu.

Tuir diplomata ne’e, apoiu ai-han nutritivu no ekipamentu desportu ba Programa “Dapur ba Povu” ajuda kombate má nutrisaun infantíl no inseguransa ai-han, enkuantu promove simultaneamente dezenvolvimentu sustentavel iha Timor-Leste.

“Embaixada Reál Tailándia nian no komunidade Tailándia sente orgullu hodi kontribui ai-han no ekipamentu desportu nian hodi apoia programa nobre ida-ne’e”, nia realsa.

Atipat Rojanapaibulya reafirma liután kompromisu Embaixada nian atu kontinua hametin relasaun amizade entre povu Tailándia no Timor-Leste.

Jornalista: Arminda Fonseca 

Editora: Maria Auxiliadora