DILI, 28 Jullu 2025 (TATOLI)—Ministru Petróleu no Rekursu Minerál (MPRM), Francisco Monteiro, simu delegasaun husi empreza Woodside Energy hodi ko’alia kona-ba vizita bá Projetu Tasi-Mane ka Suai Supply Base, ne’ebé sei realiza iha aban.
Francisco Monteiro esplika objetivu husi vizita ne’e mak atu observa ekipamentu balun ne’ebé instala ona iha Projetu Tasi Mane nian, liuliu iha Suai no Natarbora, fatin ne’ebé dezignadu atu harii planta Gás Naturál Likifeitu.
“Ekipa iha ne’e loron tolu hamutuk ho ita, haree fasilidade sira ne’e. Maibé mós ami aproveita ida-ne’e hodi halo diskusaun kle’an kona-ba espetativa Timor-Leste no Austrália nian kona-ba tékniku komérsiu nian, oinsá [buka] maneira ne’ebé di’ak liu hodi dezenvolve Greater Sunrise iha futuru”, Francisco Monteiro hateten iha Faról, ohin.
Nia subliña iha vizita aban iha parte Suai sei bá haree ekipamentu sira iha aeroportu Suai nian, fatin realokasaun ka bairru foun, observa parte ne’ebé atu harii Suai Supply Base nian, nomós haree klínika, ospitál no ekipamentu públiku sira.
Aleinde ne’e, vizita bá Natarbora nian seidauk iha ekipamentu ruma atu observa, maibé bá hatudu de’it fatin estudu nian.
Tuir nia, Timor-Leste liuhusi Governu no Estadu halo hela meiu hothotu atu iha autoestrada, Suai Supply Base no dezenvolvimentu balun iha Natarbora ho nia objetivu ikus mak bele dezenvolve indústria petrolífera iha Timor-Leste.
“Ita espera ho komunikasaun no vizita sira hanesan ne’e bele estabelese relasaun mútua, fiar malu, atu ikus mai parte ne’ebé interese atu dezenvolve hamutuk”, dehan.
Iha fatin hanesan, Vise-Prezidente Ezekutivu ba Dezenvolvimentu Tékniku no Enerjétiku iha Woodside Energy, Jullie Fallon, hateten relasiona dada Greater Surise mai Timor-Leste, Woodside iha kompromisu ba posibilidade hothotu, tanba ne’e mak daudaun ekipa mai atu hala’o vizita bá fatin sira ne’ebé prepara ba projetu ne’e rasik.
“Ida-ne’e hola parte ba ami-nia kompromisu. Ami agradese ba kolaborasaun ida-ne’e, oinsá posibilidade sira ne’e bele akontese. Tanba rezultadu husi estudu viabilidade dada kadoras mai viavel. Rezultadu husi estudu ne’e ami aseita, katak iha mós estudu ne’e hatudu iha opsaun sira ne’ebé iha. Iha mós nia risku sira ne’ebé asosia de’it ho opsaun sira ne’e oinsá. Ami iha ne’e hamutuk hodi mitiga risku sira ne’e atu haree projetu ne’e la’o di’ak”, konklui.
Notísia relevante: Governu reafirma Timor-Leste – Austrália nia kompromisu ba dezenvolvimentu Greater Sunrise
Jornalista : Arminda Fonseca
Editora : Maria Auxiliadora
