OEKUSI, 19 Agostu 2025 (TATOLI) – José Quefi, pasiente moras lepra ida husi bairru Seobeno aldeia Nonquikan suku Bobometo sub-rejiaun Oésilo, benefísia uma dignu ida husi Klibur Profisionál Divizaun Saúde (KPDS), Rejiaun Administrativa Espesiál Oekusi Ambeno (RAEOA).
Uma dignu ne’e, ho nia medida 5×6, kompleta ho kuartu rua inklui varanda ida ho toilet, ho totál gastu orsamentu hamutuk rihun $3-resin, ne’ebé kontribui husi profisionál saúde sira iha Oekusi.
Iha seremónia inaugurasaun ne’e, Koordenadór KPDS Nasionál, José dos Reis Magno, esplika, apoia ne’e, nu’udar asaun karitiva, bazea kompromisu partidu CNRT nian, bainhira seidauk kaer ukun, Maun Bo’ot Kay Rala Xanana Gusmão fó hela orientasaun ba estrutura tomak, atu kontinua nafatin halo asaun karitativa hodi tau matan ba komunidade ne’ebé laiha kbiit no sofre moras.
Nia esplika, asaun ne’e mós relasaun ho fraternidade umana, nu’udar timoroan, tenke hanoin kona-ba fraternidade umana, depois igreja Katólika mós, fó hanoin hela ba mundu, kona-ba fraternidade umana ne’e, la’ós haree de’it ba partidu maibé nu’udar ema, saida mak maluk ruma senti hela, ita hotu mós senti nune’e presiza tulun malu.
“Oferese uma simples ne’e ba pasiénte José Quefi ho família – feen no oan sira, atu hela iha uma dignu ida, tanba nia moras laiha forsa atu buka moris ho seguru, nune’e afeta ba nia família tenke hela iha lona hodi satan udan no loron manas iha tinan barak ona, entaun situasaun ne’e labele akontese, ba nia, tanba ain bubu no liman sira,” nia deklara iha ámbitu inaugurasaun, ne’ebé hala’o iha bairru Seobeno aldeia Nonquikan, foin lalais ne’e.
Iha fatin hanesan, Koordenadór KPDS Oekusi, Luís de Jesus Neno, informa, katak, inisiativa ne’e liuhusi atendimentu pesoál saúde sira, vizita tama uma sai uma, hetan nia hela de’it iha lona durante tinan barak ona, tanba nia pasiénte moras lepra.
“Liuhusi informasaun sira-ne’e mak ami tuur hamutuk ho hanoin ida katak, presiza tulun ita nia maluk José Quefi, ne’ebé mak hela iha fatin la dignu, tanba tinan barak ona nia hela de’it iha lona okos, tantu udan no loro manas, entaun ho voluntariamente ami idak-idak tau osan hamutuk to’o halo konstrusaun uma ne’e ramata, mak ohin ita mai inaugura atu entrega família ne’e,” nia katak.
Iha biban ne’e, benefisiáriu José Quefi, sente orgullu tanba bele hetan uma dignu ida kompleta ho sanitaria.
“Ha’u laiha buat ruma. Ha’u agradese de’it ba Maromak, tanba bele tau matan mai ha’u-nia família liuhusi kontribuisaun konjunta, bele hakma’an ona ha’u-nia susar ne’e. Ha’u promete sei kuidadu uma ne’e to’o ha’u-nia oan sira boot, no reza nafatin ba Avo Nana atu hetan saúde di’ak nafatin atu tulun mós ha’u-nia maluk sira seluk iha rai ne’e,” nia orgullu.
Entretantu, José Quefi sofre moras lepra durante tinan10-resin ona, no daudaun ne’e forma ona família, iha oan na’in-tolu – feto rua no mane ida.
Jornalista: Abílio Elo Nini
Editór: Rafael Ximenes de A. Belo
