OEKUSI, 09 Juñu 2026 (TATOLI) – Xefe Operasaun Eletrisidade de Timor-Leste (EDTL) Rejiaun Administrativa Espesiál Oekusi Ambeno (RAEOA), Antão Cabal, preokupa funsionamentu EDTL Oekusi, nia estatutu la define klaru atu tutela iha RAEOA ou tutela direita ba EDTL,E.P nasionál.
Antão Kabal, hato’o preokupasaun ne’e, perante enkontru ho Ministru Obra Públika (MOP), Samuel Marçal, hanesan Prezidente Konsellu Administrasaun Fundu Espesiál Dezenvolvimentu (KAFED) iha Oekusi, foin lalais ne’e.
Nia informa, antes ne’e iha deliberasaun asisténsia, iha loron 20 Abríl 2026, orienta katak EDTL Oekusi sei tutela ba EDTL E.P nasionál, depois liutiha loron rua, iha 22 Abríl, produs diploma ministeriál ida sai, ho númeru 13, ko’alia kona-ba estatutu EDTL nian, maibé la informa kona-ba EDTL Oekusi.
Nia hatutan, iha estatutu ne’e, ho organograma kompletu, komposta husi Diretór Jerál, Diretór Nasionál no Departamentu tolu, ida maka responsabiliza kona-ba produs enerjia eletrisidade renovavel, ida maka dezenvolvimentu eletrisidade no ikusliu maka seksaun administrasaun jerál.
Iha diploma ministeriál númeru 12, sita mós katak ezonerasaun ba estrutura RAEOA no nomeia mós estrutura foun hahú husi Prezidente Autoridade RAEOA to’o diretór serbisu rejionál sira.
“Maibé kargu diretór serbisu rejionál iha Oekusi, la indika diretór EDTL, ami la eziste iha ne’e, tanba ne’e ha’u rekomenda ba Ministru Obra Públika, ami EDTL Oekusi atu submete ba nasionál ka ou ba RAEOA, hanesan planu relatóriu sira, to’o agora ami seidauk hatene loloos,” nia hateten iha salaun enkontru Gabinete Prezidente Autoridade RAEOA foin lalais ne’e.
Tuir nia, kona-ba ezekusaun orsamentu ba ahi, EDTL presiza osan bo’ot, kuaze tinan ida tenki gasta to’o millaun, liliu iha produsaun enerjia elétrika, tanba Oekusi kontrata ho kompañia internasionál PT.Wartsila.
Notísia relevante:
Hatan ba rekomendasaun ne’e, Prezidente Konsellu Administrasaun Fundu Espesiál Dezenvolvimentu (KAFED), Samuel Marçal, informa, katak
“Tuir lei Fundu Espesiál Dezenvolvimentu nian, EDTL mós tama hotu iha FED nian, signifika agora iha faze tranzitóriu ne’ebé husi nasionál mai atu ajuda de’it, iha parte ne’ebé presiza ajuda malu, iha munisípíu seluk mós dalaruma sira husu asisténsia husi nasionál, tanba dalaruma sistema no planeiamentu sei frazíl ita buka ajusta malu hodi hadi’a, ne’e mak EDTL,E.P sei mai,”
Notísia relevante:
Jornalista: Abílio Elo Nini
Editór: Rafael Ximenes de A. Belo
