DILI, 19 Agostu 2025 (TATOLI) – Timoroan sira iha diáspora ne’ebé halibur aan iha East Timorese Association Peterborough (ETAP) charity organiza terseira edisaun Xanana Cup iha Peterborough, Reinu Unidu, iha loron Sábadu, 16 Agostu, iha kampu tebebola Fullbridge Recreation Park, Peterborough.
Xanana Cup 11-a-side hala’o ho objetivu atu halibur malu nu’udar Timoroan la’o-rai, atu promove pás no unidade nasionál iha komunidade diáspora nia laran.
Ekipa futebol ualu tuir iha faze apuramentu, ne’ebé mai husi sidade Peterborough, London no Kettering hatudu jogu ne’ebé furak tebes – tékniku, tátiku no abilidade oioin, iha kampu, tuir komunikadu ida ba TATOLI, ohin.
Prezidente ETAP Charity Celso Oliveira hateten, “Xanana Cup nu’udar torneiu úniku iha Peterborough, Reinu Unidu ho objetivu atu halibur Timoroan sira, promove paz no unidadi iha diaspora. Hodi komisaun organizadora Hakarak hato’o obrigadu ba ekipa tebebola tomak ne’ebé partisipa, ba membru ezekutivu ETAP no liu-liu ba voluntáriu sira ne’ebé kontribui sira-nia esforsu hodi realiza Xanana Cup ho susesu”.
Ekipa ualu ne’e kompostu husi Dalas FC, Halibur FC, Laloran FC, Kettering FC, As Family FC, Borough FC, Morisson FC, Maubere Woking FC.
Husi ekipa ualu ne’e, ekipa haat ne’ebé tama iha semifinál mak Dalas FC, As Family FC, Halibur FC no Kettering FC. Iha jornada kompetisaun ho jogu ne’ebé Fair Play, ekipa HALIBUR FC ‘dudu sees’ DALAS FC ho skór 2-0 iha faze finál, nune’e obrigadu HALIBUR FC sai-manan-na’in ka lidera tabela klasifikasaun no sai kampiaun iha jogu referidu.
Kompetisaun futeból entre timoroan sira iha diáspora, iha ámbitu Xanana Cup UK 2025 mak:
1° HALIBUR FC;
2° DALAS FC;
3° KETTERING FC;
Manan-na’in simu tasa rotativu ida, tasa primeiru lugar no osan £500, segundu lugar simu tasa no osan £400, terseira lugar simu tasa no osan £300.
Nune’e mós iha prémiu ba mellor guarda-rede (goalkeeper), mellor jogadór (best player), mellor ekipa (best team) no mellor markadór (top score).
Torneio Xanana terseira edisaun ne’e diriji hosi arbitru Paul Ozzo husi Peterborough Referee Association (Asosiasaun Arbitru Peterborough).
Iha terseira temporada Xanana Cup ida-ne’e foin ba dahuluk hola parte husi ekipa tebebola feminina husi As Family FC. Nune’e mós ekipa juvenil ka labarik ki’ik husi ekipa “Timor P’boro FC”.
Durante torneiu, iha ambiente furak tebes tanba Timoroan hatudu fraternidade, pás no sira anima ho múzika no ai-han Timor-Lestenian.
Entretantu, dezde 2002 to’o ohin loron Sidade Peterborough halibur timoroan besik rihun-ida. Inan-aman serbisu iha fabrika, maibé oan sira frekuenta eskola husi primária, sekundária to’o universidade.
ETAP nu’udar charity rejistadu iha UK halo hodi fó apoiu timoroan sira iha Peterborough no fatin seluk.
Jornalista: Camílio de Sousa
Editór: Rafael Ximenes de A. Belo
