DILI, 26 Agostu 2025 (TATOLI)-Parlamentu Nasionál, liuhusi reuniaun plenária estraordinária Komisaun Permanente, hala’o sesaun solene hodi fó omenajen espesiál ba falesimentu no memória antiga deputada Florentina da Conceição Pereira Martins Smith “Murak”.
Antes sesaun solene, ezekusaun inu-nasionál no minutu ida silénsiu ba memória erói sira ne’ebé luta ba indepedénsia nasaun ne’e no espesiál ba memória antiga deputada iha lejislatura datoluk.
“Ha’u deklara aberta, sesaun solene, memória eis-deputada”, Prezidente Parlamentu Nasionál, Maria Fernanda Lay, hato’o iha sala plenária, ohin.
Nune’e, meza lee sai testu votu númeru 13/2025 pezár ba falesimentu eis-deputada Florentina Smith.
Iha intervensaun, deputada FRETILIN, Nurima Ribeiro Alakatiri, dehan FRETILIN no povu Timor-Leste lakon figura di’ak ida. “Florentina nu’udar kombatente ba liberdade, líder polítika, no feto forte ne’ebé dedika nia moris tomak ba kauza pátria nian, ba justisa sosiál no igualdade”, dehan.
Nia haktuir, matebian nia serbisu no luta ba nasaun husi idade joven, envolve an iha movimentu estudante nian no partisipa ativa iha organizasaun estudante timoroan sira -nian, no sai membru UNETIM, OPJT, no OPMT.
Iha kontestu ida-ne’e mak maktoban haku’ak ninia identidade polítika, hodi tau ninia talentu no korajen tomak iha serbisu FRETILIN no luta ba libertasaun nasionál.
Servisu nu’udar Vise-Sekretária OPMT nian iha zona oioin rezisténsia nian, sempre hamriik iha povu nia sorin, hodi mobiliza feto, juventude, no komunidade tomak ba kauza independénsia nasionál.
Durante okupasaun Indonézia, hetan persegisaun, dadur, no vijilánsia beibeik. “Maibé represaun ka sofrimentu la halo nia rezolusaun nakdoko. Nia fiel nafatin ba nia rain no ba esperansa ba Timor-Leste ne’ebé livre, no sai nu’udar ezemplu ba firmeza, korajen no lealdade”, deputada ne’e haktuir.
Nia hateten, kontribuisaun ba vida polítika ho restaurasaun independénsia, matebian nafatin iha liña frente. Asume responsabilidade oioin iha partidu FRETILIN no antes ne’e asume pasta importante iha órgaun soberania sira ho dedikasaun no determinasaun hala’o knaar sira ne’e ho ativu to’o hakotu iis.
Deputada Nurima, hateten saudoza husik hela legadu iha nia moris nu’udar ezemplu dedikasaun totál ba kauza libertasaun nasionál, justisa sosiál, no emansipasaun feto timoroan sira-nian.
“Nia trajetória hatudu mai ita oinsá luta ba nasaun, labele haketak husi luta ba igualdade no dignidade umana. Ita sei hanoin nafatin ba Florentina Smith la’ós de’it ba nia korajen polítika no dedikasaun ba luta, maibé mós ba nia personalidade ne’ebé kalma no laran-lu’ak, nunka rai hirus no odi ba ema seluk”, katak.
Reprezentante husi bankada CNRT, PD, PLP no KHUNTO mós espresa sentimentu solidariedade ba família enlutada no husu orasaun atu akompaña matebian deskansa hakmatek iha reinu lalehan.
Bibán ne’e, Prezidente Parlamentu, membru meza no deputadu sira prezente presta omenajen ikus ba isin mate matebian iha sala plenária ne’ebé nakonu ho tristeza no matan-been.
Hafoin sesaun solene, família enlutada no membru Parlamentu sira lori kedas mate-isin hodi bá haloot iha Jardín Erói Metinaru.
Notísia relevante: Maktoban Florentina Smith inspiradora ne’ebé serbí ho domin ba Maromak no povu
Jornalista: Nelson de Sousa
Editora: Maria Auxiliadora
