DILI, 12 Setembru 2025 (TATOLI)-Governu aprova projetu rezolusaun, ne’ebé aprezenta hosi Ministru Defeza, Donaciano do Rosário Gomes, kona-ba kompromisu operasionál konjuntu entre Falintil – Forsa Defeza Timor-Leste no Polísia Nasionál Timor-Leste (PNTL).
Tuir dokumentu ne’ebé Tatoli asesu, objetivu husi kompromisu operasionál konjuntu ne’e atu mantein orden públika durante vizita sira mai Timor-Leste hosi figura oioin no membru Governu hosi nasaun amigu sira, nomós iha ámbitu husi eventu nasionál sira ho importánsia boot, hanesan Timor-Leste nia adezaun ba ASEAN, serimónia ofisiál ba komemorasaun tinan 50 Proklamasaun Independénsia no festividade natál no tinan foun nian.
“Rezolusaun Governu ne’e estabelese operasaun patrullamentu no vijilánsia iha fatin sensivel iha munisípiu hotu-hotu, hodi prevene aktu distúrbiu sosiál. Forsa Tarefa ne’e sei koordena husi Xefe Estadu-Maiór-Jenerál Forsa Armada no Komandante-Jerál PNTL, ho apoiu hodi entidade governamentál no institusionál oioin”, refere nota ne’e.
Rezolusaun ne’e mós prevee medida espesífiku sira, hanesan define kadeia komandu, regra empeñamentu no apoiu intelijénsia nian, no mós uzu proporsionál hosi forsa tuir lei ne’ebé vigora. Forsa-Tarefa sei hala’o nia operasaun hahú iha loron 14 fulan-Setembru tinan 2025 to’o loron 06 Janeiru tinan 2026.
Jornalista: Arminda Fonseca
Editora: Maria Auxiliadora
