DILI, 15 Setembru 2025 (TATOLI) – Ekipa selesaun nasionál Timor-Leste sei partisipa faze kualifikasaun Asian Football Confederation (AFC) Futsál Asian Cup tinan-2026 iha Kirgizistaun.
Kualifikasaun Tasa Ázia Futsal AFC 2026 hanesan prosesu kualifikasaun ne’ebé organiza hosi Konfederasaun Futeból Aziátiku (AFC, sigla inglés) hodi determina ekipa sira-ne’ebé partisipa iha Tasa Ázia Futsal AFC 2026, edisaun ba da-18 hosi kampeonatu internasionál futsál mane Ázia nian.
Selesaun nasionál Futsál hamutuk jogadór na’in-14 kompostu guarda rede na’in-rua inklui jogadór 12 ne’ebé tuir planu aban tersa, 16 Setembru sei desloka ba Kirgizistaun hodi tuir faze kualifikasaun grupu F hamutuk ho nasaun tolu seluk hanesan Uma-na’in Kirgizistaun, Uzbekistaun no Palestina.
Adjuntu Sekretáriu Jerál Federasaun Futeból Timor-Leste (FFTL), Fernando Xavier liuhosi serimónia despedida hato’o mensajen ba jogadór sira atu mantein disiplina no husu jogu ekipa bele hakat liu faze kualifikasaun grupu F.
“Ida-ne’e la’ós previleiju maibé ne’e responsabilidade tanba misaun atu defende imajen bandeira Timor-Leste,” Fernando Xavier enkoraja jogadór timoroan iha edifísiu FFTL, Bairro dos Grilhos, segunda ne’e.
Fernando relata, disiplina sai fatór determinante, la’ós de’it iha kampu maibé hahu husi viajen to’o fatin destinadu inklui fila mai Timor-Leste nune’e sei fó rezultadu pozitiva iha kualifikasaun AFC Futsál 2026.
“Hau fó fiar ba ekipa ida-ne’e, iha mundu futeból buat hotu posibilidade akontese. Tenki fiar-an mesmu grupu F konsidera todan maibé nafatin optimista,” Fernando Xavier argumenta.
Iha fatin hanesan, jogadór atuál kapitaun ekipa selesaun nasionál Futsál Timor-Leste, Zaquiel Pinto, hateten durasaun preparasaun hamutuk semana-rua sai nu’udar bukae ba ekipa hodi haka’as-an másima iha kompetisaun kualifikasaun faze kualifikasaun AFC Futsál Asian Cup 2026.
“Espera materiá ne’ebé durante ne’e ami treinu bele aplika iha Kirgizistaun,” Pinto akresenta.
Kompetisaun AFC Futsál Asian Cup 2026 sei iha faze kualifikasaun ne’ebé kompete husi nasaun 31 fahé ba grupu A to’o H no Timor-Leste rasik koloka iha grupu F hamutuk ho nasaun tolu seluk hanesan Kirgizistaun nu’udar uma-na’in, Uzbekistaun no Palestina.
Entertantu, tuir oráriu Timor-Leste sei hala’o jogu dahuluk hasoru uma-na’in Kirgizistaun iha loron, 20 Setembru no kontinua kontra Uzbekistaun iha loron-22 Setembru no jogu ikus kontra Palestina iha loron-24 Setembru.
Treinadór garante ekipa nasionál hakat liu grupu F
Treinadór nasionál garante ekipa selesaun sei hakat liu faze kualifikasaun grupu F kompetisaun Asian Football Confederation (AFC) Futsál Asian Cup tinan-2026 iha Kirgizistaun.
Treinadór selesaun nasionál Futsál Timor-Leste, Rain Ferdinand, esplika, prosesu preparasaun ekipa nasionál iha inisiu fulan-Setembru ne’ebé sira selesionadu husi primeiru no segunda divizaun Liga Futsál Timor-Leste hamutuk jogadór na’in-14 no atúal preparadu atu kompete iha grupu F.
“Ha’u garante ekipa nasionál sei bele kompetitivu kontra nasaun rua seluk mesmu uma-na’in Kirgizistaun kualidade di’ak,” Treinadór selesaun nasionál Futsál Timor-Leste ne’e informa.
Nia dehan, sei foku gaña pontu tolu husi uma-kain Kirgizistaun nune’e iha oportunidade liu faze grupu F tanba konsideradu jogu rua seluk hanesan Uzbekistaun no Palestina garantia Timor-Leste bele gaña pontu.
Nia otimista sei hetan rezultadu pozitiva tanba konfia ho materiá jogadór ne’ebé maioria koñese no komprende malu bainhira jogu iha kampu no hela aplikasaun tátika inklui estratejia iha kompetisaun.
“Jogadór sira-nia kondisaun di’ak hotu mesmu tempu barak liubá treinu,” Ferdinand akresenta.
Jornalista : Natalino Belo
Editór : Evaristo Soares Martins
