DILI, 05 Juñu 2026 (TATOLI)—P rezidente Repúblika, José Ramos-Horta, hala’o enkontru ho embaxadór Arjentina naun rezidensia, Gustavo Coppa, hodi diskute kona-ba reativa hikas kooperasaun bilaterál entre nasaun rua liuliu iha área saúde no desportu.
Kooperasaun ne’e nu’udar responde lalais husi Governu Arjentina ba inisiativa no pedidu ne’ebé Xefe Estadu hato’o iha tinan 2025 liubá.
”Tinan kotuk, Prezidente Ramos-Horta iha inisiativa hodi halo asaun kooperasaun ida iha ámbitu saúde nian. Tanba nia koñese kapasidade ne’ebé Arjentina iha, nia husu kapasitasaun husi médiku arjentinu sira no Governu arjentinu fó resposta lalais ba hakarak ne’e,” Embaixadór Gustavo Coppa ne’e informa ba jornalista sira iha Palásiu Prezidensiál Nicolau Lobato, Bairru Pite.
Kuaze tinan ida liutiha husi pedidu ne’ebé Xefé Estadu hato’o ba Governu arjentina, kiooperasaun ne’e hahú realiza ona no delegasaun médiku Arjentina nian sei to’o iha Timor-Leste iha domingu semana ne’e.
Delegasaun iha etapa primeiru ne’e kompostu husi dekanu no xefe profesór sira husi Universidade Nasionál Córdoba (UNC) iha Arjentina.
Aleinde ne’e, sei iha mós formasaun ba médiku timoroan sira sei kobre área tolu hanesan saúde públika, saúde no kuidadu família no infektolojia. Kursu naruk ho totál oras 48 ne’e sei la’o husi segunda to’o sesta iha semana oin, UNC sei entrega sertifikadu ba partisipante sira-ne’ebé susesu.
Planu kapasitasaun ne’e sei fahe ba etapa tolu (3) mak hanesan etapa Primeiru mak Formasaun direta husi dekanu no profesór UNC nian ba médiku timoran sira, etapa Segundu ba kapasitasaun virtuál husi Arjentina ba Díli no etapa terseiru ne’e Médiku timoroan sira sei dezloka ba Arjentina hodi hetan esperiénsia direta iha ne’bá, ne’ebé prevee sei akontese iha tinan oin (2027).
Aleinde saúde, enkontru ne’e mós ko’alia kona-ba kooperasaun iha futuru ba dezenvolvimentu desportu liuliu futeból, hodi aproveita poténsia Arjentina nian nu’udar rai esportadór jogadór no tékniku futeból mundiál.
”Ita mós ko’alia kona-ba kooperasaun iha futuru iha ámbitu desportu nian. Imi hotu hatene katak Arjentina ne’e rai ida ne’ebé esporta jogadór futeból. Entaun, iha diálogu ho Prezidente Ramos-Horta, ita mós ko’alia kona-ba ne’e atu nune’e, iha tempu besik Arjentina bele oferese kooperasaun husi jogadór futeból no tékniku futeból nian ba Timor-Leste. Buat ne’e mós sei la’o ba oin iha tinan oin mai,” nia haktuir.
Kooperasaun ne’e hahú fali relasaun bilaterál entre Timor-Leste no Arjentina, ne’ebé antes ne’e paradu tanba impaktu husi propagasaun pandemia COVID-19.
Jornalista : Hortêncio Sanchez
Editór : Cancio Ximenes
