VIKEKE, 18 Setembru 2025 (TATOLI)—Eletrisidade Timor-Leste, Empreza Públika (EDTL, E.P.), Kinta ne’e, halakan ona projetu eletrifikasaun ba populasaun uma-kain 50 husi Aldeia Sana, Suku Uitame, Postu Uatulari, Munisípiu Vikeke.
“Ohin ita mai hamutuk ho empreza hodi halo lakan projetu eletrifikasaun implementadu iha tinan 2025 husi parte Sana, ne’ebé instalasaun ba uma-kain sira mós hotu ona. Ita loke daudaun ona atu populasaun sira bele asesu ba naroman,” Gabinete Inspesaun EDTL, E.P., Teodoro de Almeida Fernandes ba TATOLI, iha Aldeia Sana.
Nia dehan, projetu eletrifikasaun pakote ida kompostu husi Sana, Queturai no Luruboru, entretantu parte bairru Buitau seidauk, empreza kontinua servisu hodi konkui iha fulan-Dezembru tinan ne’e.
Enkuantu, pakote daruak husi Uatulari liga bá Uatulari Antiga, kompostu husi Kaisebalata, Borubai, Matau no Abu.
“Obra sira-ne’e ami espera iha fulan-Dezembru bele konkluidu. Maibé, ba área sira-ne’ebé mak seidauk asesu ba eletrisidade hanesan Makadike Uaitame ita sei haree,” nia hato’o.
Notísia relevante: Aldeia 20 iha Ainaru seidauk asesu eletrisidade
Iha fatin hanesan, abitante Sana, Ermino Lopez hato’o agradesimentu ba Governu liuhusi EDTL, E.P. tanba husi okupasaun Indonézia to’o mai ukun-aan, foin iha tinan 2025 populasaun Sana bele asesu eletridade.
“Ami sente orgullu ba Governu tanba liga eletrisidade ba ami hodi ami asesu. Kuaze tinan barak ami iha nakukun laran, sai difikuldade ba ami. Kalan estuda mós ladi’ak. Ami depende de’it ba lilin no lampurina mak foin ami-nia oan sira estuda,” nia haktuir.
Projetu eletrifikasaun pakote ida husi Sana, Queturai, Luruboru no bairo Buitau ho totál orsamentu ba obra $251.323,64, responsabiliza husi Empreza Aelixo AA Unipessoal Lda no JV SM Bark Tecnolgi, Lda.
Tuir observasaun jornalista TATOLI nota katak hafoin EDTL, E.P. halo lakan eletrisidade, komunidade no estudante sira sente kontente tanba sira asesu ona naroman.
Serimónia halo lakan eletrisidade ba parte Aldeia Sana ne’e partisipa husi tékniku EDTL, E.P. Munisípiu Vikeke, komunidade no estudante sira.
Jornalista: Vitorino Lopez da Costa
Editór: Xisto Freitas da Piedade
