BOBONARU, 18 Setembru 2025 (TATOLI)-Eskola Bázika Filiál (EBF) Lebos, iha suku Lebos, postu administrativu Loloto’e, munisípiu Bobonaru, iha tinan barak ona hasoru problema falta bee-moos no saladeaula ne’ebé danifika ona.
Koordenadora EBF Lebos, Retshia Ili Masi, konfirma katak kestaun ne’e sai ona preokupasaun lorloron estudante no manorin-na’in sira. “Ami iha ne’e estudante sira preokupa barak liu mak falta bee-moos. Ami atu uza de’it mós ami-nia estudante sira mak lori rasik”, nia hateten.
Aleinde falta bee-moos, eskola ne’e mós enfrenta problema seluk mak saladeaula tolu mak hetan danifika husi dezastre naturál. “Ida-ne’e ameasa tebes ba ami-nia estudante sira, tanba varanda sira ne’e aat, nakfera hotu kedas, depois plafón mós la di’ak hotu ona”, nia hato’o.
Juleta Moniz, reprezentante inan-aman husi estudante husu ba parte kompetente atu rezolve problema ne’e imediata, tanba estudante nia devér mak atu partisipa iha ensinu no aprendizajen, la’ós lalin bee bá eskola.
“Ami-nia hakarak ne’e halo planu ida para hatama bee ba eskola, tanba ha’u nia oan loroloron hiit bee masa ida lori bá eskola iha dadersán-dadersán, tinan sei kiik, sira tenke lori bee masa ida”, nia lamenta.
Xefe suku Lebos, Jacinto Pereira, haktuir katak iha tinan hirak liubá, Diresaun Servisu Munisipál Água, Saneamentu no Ambiente (SMASA) halo ona instlasaun bee-moos ba eskola referida, maibé ema deskoñesidu estraga kanál distribuisaun bee, nune’e to’o agora difikulta estudante no manorin sira atu uza bee moos ba nesesidade sanitária no merenda eskolár.
“Agora, labarik sira mak lori bee rasik, fornesedór sira la lori, afinál ne’e ninia serbisu. Tanba ne’e mak husu edukasaun atu koordena ho SMASA atu haree took problema ne’e, tanba labarik ne’e bá atu aprende, la’ós hiit fali bee husi uma bá eskola, serbisu todan ne’e sira atu estuda ka oinsá”, Jacinto preokupa.
Diretór SMASA munisípiu Bobonaru, Armindo Cardoso Barros, rekoñese problema ne’e akontese duni no sira tau ona iha planu. “Uluk ita kanaliza tiha bee, maibe agora la di’ak ona, entaun iha tempu badak ami-nia ekipa sira sei tun bá haree para bele buka solusaun”, nia salienta.
Tuir dadus tinan letivu 2025, EBF Lebos akumula estudante na’in-124 no profesór hitu.
Notísia relevante: CVTL instala gabiaun hodi proteje estrutura EBF Lebos
Jornalista: Sergio da Cruz
Editora: Maria Auxiliadora
