OEKUSI, 29 Setembru 2025 (TATOLI) – Komandu FALINTIL-Forsa Defeza Timor-Leste (F-FDTL), lideradu Xefe Estadu Maior Jenerál, Tenente Falur Rate Laek, oferese materiál desportiva inklui livru istória luta nian ba estudante sira iha Eskola Bázika Filiál (EBF) Bítila iha suku Bene-Ufe sub-rejiaun Nítibe Rejiaun Administrativa Espesiál Oekusi Ambeno (RAEOA).
Notísia relevante:Komandu F-FDTL tulun ai-han ba labarik sira iha Orfonatu Topohonis Oekusi
Xefe Estadu Maior Jenerál, Tenente Falur Rate Laek, esplika, asaun ne’e nu’udar programa prinsipál ida husi Departamentu Sívul Militár nian, tanba povu bee FALINTIL mak ikan.
“Ne’e baibain halo parte F-FDTL nia kooperasaun ho sívil militár. Fatin seluk mós ita fó apoia tanba militár ne’e moris atu apoia podér sira, autoridade sira no seguransa, protesaun sívil sira, atu luta ba bein-estar populasaun nian. Ne’ebé, ita halo ida-ne’e, forsa defeza ita tenke haree ema hotu, buat ne’ebé ohin ita oferese ne’e, oferese ho domin la’ós obriga mak ita halo,” nia dehan iha Citrana.
Profesór EBF Bítila, Aigelio Toma’e, hato’o agradese tanba ho apoia materiál referida bele kompleta nesesidade eskola nian.
“Agradese tanba primeira-véz Avo Falur mai vizita ami-nia eskola iha fatin izoladu ne’e, ne’ebé orgullu tanba apoia ne’e importante atu kompleta ami-nia fasilidade ba estudante sira, tanba baibain ami uza fundu konseisaun eskolár maibé la sufisiente. Ne’ebé, ami sente kontente mós tanba oferese livru istória rua mai ami atu uza reforsa ba dixipliña iha eskola,” nia orgullu.
Entretantu, fasilidade ne’ebé komandu F-FDTL oferese mak hanesan, pasta eskola, bola voli, farda desportu no livru istória Timor-Leste inklui livru istória Tenente Falur Rate Laek nian rua – versaun bilinguál, ho títulu Falur nia semo – O voo do pombo.
Notísia relevante:Brigadeiru Falur lansa livru “O Voo do Pombo” ho matabeen
Totál estudante iha EFB Bítila hamutuk na’in-102 ho profesór na’in-lima no guarda ida.
Jornalista: Abílio Elo Nini
Editór: Rafael Ximenes de A. Belo
