OEKUSI, 11 Setembru 2025 (TATOLI) – Komandu FALINTIL-Forsa Defeza Timor-Leste (F-FDTL), liuhusi Departamentu Sívil Militár, kuarta ne’e, tulun oan-ki’ak sira ho ai-han nesesidade bázika iha Orfonatu Topohonis, Rejiaun Administrativa Espesiál Oekusi Ambeno (RAEOA).
Responsavel Departamentu Sívil Militar, Tanente Koronél, Valero Valente, informa, asaun sosiál ne’e, nu’udar programa kontinuasaun Komandu F-FDTL ba selebrasaun aniversáriu FALINTIL ba dala-50.
“Programa ne’e, kontinuasaun husi selebrasaun aniversáriu loron FALINTIL 20 Agostu foin lalais ne’e. Tuir loloos apoia ona antes maibé iha asuntu balun presiza hala’o iha sentrál, ne’ebé apoia ne’e halai liu ba ai-han nesesidade bázika, atu tulun sira bele uza nesesidade lor-loron nian,” nia dehan iha Oekusi, ohin.
Iha biban ne’e, Responsavel Topohonis Mahata, Imelda Liliana Tarung, hato’o agradese oan-ki’ak sira-ne’ebé hela iha Topohonis hamutuk na’in-35, komposta husi dormitóriu Mahata 23 maioria estudante Ensinu Báziku Sentrál (EBC) no Ensinu Sekundáriu Jerál no dormitóriu Kutete na’in-12 maioria ensinu primária.
“Ami kontente no hakfodak tanba, ami la’ós mesak, derrepente hetan vizita husi F-FDTL, tanba ne’e ami kontente tebes. Ida-ne’e bele sai Maromak nia dalan bensaun ne’ebe barak ba ami. Maibé, ami mós sei kanaliza bensaun ida-ne’e ba ema seluk, la’ós ba ami de’it, tanba ne’e ami mós husu, programa ida-ne’e la’ós primeiru no ikus maibé se bele sei kontinua nafatin,” nia orgullu.
Diretór Diresaun Rejionál Administrasaun, José Tanesib Anunu, ne’ebé reprezenta Autoridade RAEOA, promete sei informa ba Prezidente Autoridade RAEOA, nune’e bele kontinua tau matan iha futuru.
“Inisiativa ne’e tulun tebes oan-sira iha orfonatu Topohonis. Ha’u hanoin Autoridade RAEOA mós presiza hatutan asaun sosiál ne’e, ne’ebé ha’u sei relata asuntu ne’e ba Prezidente Autoridade liuliu departamentu solidariedade sosiál bele tau matan nafatin ba oin,” nia hateten.
Notísia relevante:Prezidente Autoridade RAEOA Vizita Labarik 103 iha Orfanatu Topu Honis
Entretantu, nesesidade bázika ne’ebé Komandu F-FDTL oferese mak hanesan, foos rai kilograma 25 saka 42, mie sedap kaixa 24, masin-midar kilograma 50 saka tolu, deho kaixa haat, mina-goreng kaixa haat, xá kaixa tolu, kafé kaixa ida, rinso kaixa rua, sabaun haris kaixa ida, masin kaixa rua, pasta-dente kaixa ida, eskova kose nehan kaixa ida.
Jornalista: Abílio Elo Nini
Editór: Rafael Ximenes de A. Belo
