OEKUSI, 03 Jullu 2026 (TATOLI) – Sentru Lojístika Nasionál (CLN, sigla-Portugés) kinta ne’e hala’o enkontru koordenasaun ho Autoridade Rejiaun Administrativa Espesiál Oekusi Ambeno (RAEOA), ba futuru atu estabelese armazenamentu foos hodi halo intervensaun emerjénsia bainhira mosu dezastre naturál.
Notísia relevante:CLN halo intervensaun foos ho presu baratu iha Oekusi
“Ohin ami mai koordena ko’alia kona-ba nesesidade bázika liu-liu kona-ba presu foos nian. Nune’e mos kona-ba politika ne’ebe maka halo produtu lokál iha Oe-kusi, tanba ita haree katak konsumidór sira ne’e, dependénsia foos ne’e ba liu importansaun nian, entaun rezerva estratéjiku ba Estadu nian, bainhira kondisaun sira mosu, hanesan dezastre naturaís ruma, ka bailoron naruk, Governu iha rezerva naton, hodi responde ba situasaun ne’ebe maka mosu iha futuru,” Prezidente CLN, António de Aroújo Soares, hateten ba jornalista sira iha Salaun Gabinete RAEOA, kinta ne’e.
Dirijente CLN ne’e haktuir katak intensaun sorumutu ho Prezidente Autoridade RAEOA, tanba kuaze tinan barak ona, depois instituisaun ne’e harii katak husi Oekusi ninian ne’e, seidauk rejista produtu ida katak ida-ne’e mai husi Oekusi.
“Tanba ne’e, husu ba Autoridade hodi ba oin hamutuk sensibiliza informasaun polítika ida-ne’e ba to’o Agrikultura hodi kuda produtu, nune’e sira bele hatene, talvez informasaun la to’o, entaun sira mós seidauk lahatene,” nia konsidera.
Notísia relebvante:CCLN koordena Autoridade RAEOA: Posibilidade, sei investe saúde no seguransa iha Oekusi
Iha biban ne’e Prezidente Autoridade RAEOA, Régio Servantes Roméia da Cruz Salu, konsidera polítika disponibilizasaun ba estoke foos iha Oekusi importante atu responde ba dezastre naturál, tanba Oekusi jeografikamente do’ok husi Governu Sentrál.
“Ohin ami halo diskusaun kona-ba atu bele disponibiliza estoke foos nian ba kualker tempu, ne’ebé ha’u sei ba haree armazein ita-nian atu bele prepara, tanba ita-nia diresaun relevante sira propoin iha fulan kotuk kona-ba fatin armazen estoke ruma, hodi apoiu no responde ba dezastre naturaís bainhira akontese,” nia hateten.
Autoridade énfaze mós katak kooperasaun Autoridade RAEOA halo ho CLN importante, atu fó oportunidade ba agrikultór sira iha Oekusi, sira bele faan sira nia produtu lokál ba CLN iha Oekusi de’it.
”CLN prontu ona no ita agora iha armazen rua iha Oekusi, maka armazein agrikultura nian iha Aenmat, maibé ida-ne’e mós seidauk utiliza ho másimu, no armazein ida fali iha sidade laran, entermus kapasidade ita iha prontidaun atu bele simu no akumula, maibé ita tenke la’o tuir mekanizmu saida mak CLN aplika, no aspetu sira-ne’ebé presiza halo tuir hodi fornese”, nia informa.
Jornalista: Abílio Elo Nini
Editór: Rafael Ximenes de A. Belo
