OEKUSI, 02 Jullu 2026 (TATOLI) – Sentru Nasionál Lojístika (CLN, sigla portugés), kinta ne’e, hala’o intervensaun foos baratu ho totál tonelada 76,50 iha Rejiaun Administrativa Espesiál Oekusi Ambeno (RAEOA). Foos ho kilograma 10 (10 kg) ne’e fa’an ho presu baratu de’it ho montante dollár $4,50 sentavós kada saka.
“Ohin ita mai hasoru Prezidente Autoridade atu halo intervensaun presu ba iha nesesidade bázika hanesan foos baratu, ne’ebé antes ne’e ita haruka ona karta mai iha Autoridade hodi fó autorizasaun,” Prezidente CLN, António de Araújo Soares, hateten ba jornalista sira iha salaun Gabinete Prezidente RAEOA, ohin.
Dirijente CLN ne’e informa katak, alvu ba intervensaun ne’e sei bazeia ba fatin sira-ne’ebé Autoridade RAEOA indika, hanesan postu administrativu, suku, no aldeia sira-ne’ebé presiza liu. Foos tonelada 76,50 ne’e mai hodi responde tuir kapasidade kompra komunidade nian.
“Presu iha merkadu kilograma 20 hetan dollár $11.50 sentavós to’o dollár $12.00, maibé ida-ne’e tipu subsidíu husi Governu entaun nia mekanizmu ita hatuun nia presu kilograma 10 ho presu dollár $4,50 sentavós kada saka, atu fó biban ba sira-ne’ebé vulneravál liu, entermus kapasidade atu hola, entaun sira iha kbiit uitoan atu hola, ho nia kritériu, kada ema ida másima hetan saka rua de’it labele liu, nune’e bele sufisiénte ba ema hotu,” nia hateten.
Reforsu baze legál ba intervensaun
Atu asegura katak intervensaun bázika ne’e kumpri padraun estadu nian, CLN no Autoridade RAEOA bazeia ba kuadru legál hirak ne’e:
- Artigu 57 husi Konstituisaun RDTL (Saúde no Seguransa Sosiál): Ne’ebé fo kbiit no kna’ar ba Estadu hodi promove no asegura seguransa alimentár ba sidadaun hotu, liliu ba grupu kbiit-laek sira.
- Dekretu-Lei n.º 54/2022 (Rejime Subsidíu ba Produtu Alimentár Báziku): Nu’udar baze legál ne’ebé fó autorizasaun ba Governu liuhusi CLN hodi sosa no hatuun folin produtu esensiál (foos) hodi nune’e bele kria estabilidade presu iha merkadu uainhira mosu krize ka folin sa’e.
Reasaun husi Autoridade RAEOA
Prezidente Autoridade RAEOA, Régio da Cruz Salu, konsidera intervensaun presu baratu husi CLN ne’e sei ajuda tebes komunidade sira hodi asesu ba ai-han, tanba daudaun ne’e seguransa alimentár iha Oekusi menus daudaun.
“Importante tebes, tanba kada tinan RAEOA sempre halo intervensaun liliu iha períodu espesifiku ligadu iha tempu seguransa alimentár menus itoan, maibé mós tanba iha situasaun agora ita-nia nivél sub má-nutrisaun ne’e maka’as, entaun kontribuisaun merkadu ba produtu ho presu foos kualidade 15% broken no presu tuun, ha’u hanoin ne’e fó fatin ba segment tomak ita-nia família sira bele asesu,” nia hateten.
Jornalista: Abílio Elo Nini
Editór: Rafael Ximenes de A. Belo
