DILI, 02 Abríl 2025 (TATOLI)—Prezidente Sentru Lojístika Nasionál (CLN), António de Araújo Soares, hateten durante ne’e CLN halo ona intervensaun bá merkadu ho foos importadu hamutuk tonelada 800-resin ba populasaun sira iha munisípiu.
“Durante ne’e ita halo ona intervensaun bá merkadu ho foos importadu hamutuk 800-resin, ho foos lokál hamutuk tonelada 49 ba populasaun sira iha munisípiu,” António de Araújo Soares dehan ba TATOLI, via telefónema, kuarta ne’e.
Nia dehan, husi intervensaun merkadu ne’e, foos importadu sira ne’ebé mak iha armazein hamutuk tonelada 1.997 no foos lokál hamutuk tonelada 389.
“Intervensaun merkadu ne’e ita kontinua fali iha fulan ida-ne’e, tanba iha fulan-Fevereiru no Marsu ita-nia transporte limitadu, nune’e ita bele komesa fali iha fulan ida-ne’e, entaun hahú ona iha Munisípiu Likisá, Baukau no Kovalima,” nia haktuir.
Nia esplika, Munisípiu Aileu daudaun ne’e iha ona liña koordenasaun, nune’e iha tempu badak bele halo ona intervensaun iha-ne’ebá.
“Munisípiu Manatutu mós ita halo ona intervensaun, maibé Munisípiu Vikeke no Lautein mak seidauk maibé tempu badak ita sei halo hotu intervensaun tuir presu ne’ebé iha, nafatin $12.50,” nia relata.
Nia informa, tinan ne’e, CLN fó prioridade ba hare-kulit no seidauk iha planu atu sosa tan foos importadu.
“Ita-nia prioridade ne’e ba hare-kulit, maibé karik hare-kulit la tuir saida mak ita previsaun mak ita aprezenta ba Vise Primeiru-Ministru no Ministru Koordenadór Asuntu Ekonómiku depois aprova ona mak ita haree. Maibé, ida-ne’e mós depende ba situasaun ne’ebé mak iha,” António haktuir.
Nia hatutan, hare-kulit ne’e barak iha Bobonaru, Ermera, Manatutu, Baukau, Lautein, Vikeke, Kovalima, Manufahi no Rejiaun Administrativa Espesiál Oekusi Ambenu (RAEOA).
Jornalista: Felicidade Ximenes
Editór: Xisto Freitas da Piedade
