Assanami: Unidade Nasionál sosa ho ruin no raan
DILI, 12 Novembru 2026 (TATOLI)—Vise-Primeiru-Ministru, Mariano Assanami Sabino, husu timoroan sira halo reflesaun katak unidade nasionál ne’e sosa ho ruin no raan tanba timoroan barak mak mate to’o agora buka nia restu mortál seidauk heten.
“Juventude, família, estudante sira hotu, ohin loron ida ba ita atu halo reflesaun, hanoin hikas katak unidade nasionál ita sosa ho ruin no ran, to’o agora sira lubuk ida mak ita seidauk halibur sira-nia restu mortál, mai ita fó onra no valoriza sira,” Vise-Primeiru-Ministru Mariano Assanami Sabino hateten iha nia diskursu bainhira komemora Loron Masakre Santa Cruz ba da-35 iha Semitériu Santa Cruz, Dili, Kinta ne’e.
Nia hateten, Timor-Leste hanesan jardim dos eroi, ne’ebé sei moris nafatin husi jerasaun ba jerasaun.
“Timor-Leste jardim dos eroi, mai ita fó rekoñesimentu katak sira-nia mate hanesan jardim ida ne’ebé sei moris nafatin, sei tutan husi jerasaun ba jerasaun,” nia dehan.
Nia husu mós ba joven sira atu halo kompromisu de onra ba sira-ne’ebé laiha ona, katak unidade nasionál tenke metin nafatin.
“Ba joven sira, ba família no timoroan hotu iha rai-laran no rai-li’ur, loron ohin ne’e ba ita hotu atu halo kompromisu de onra ba sira-ne’ebé laiha ona katak unidade nasionál tenke metin nafatin. Ita nafatin iha hun ida de’it atu luta ba moris di’ak povu ida-ne’e nian,” nia subliña.
Renova Paktu Unidade Nasionál
Iha fatin hanesan, Prezidente Komité 12 de Novembru, Gregorio Saldanha, hateten loron ohin ba Timor-Leste no timoroan sira atu halo renovasaun ba paktu unidade nasionál.
“Ohin loron ba ita atu halo renovasaun ba paktu unidade nasionál ne’ebé ita presiza tebes hodi ajuda ita-nia servisu loroloron hodi ita bele manán dezenvolvimentu ba ita-nia nasaun tanba povu presiza tebes,” Gregorio Saldanha hateten.
Nia hatutan, Timor-Leste mak uma boot ida hodi halibur timoroan hotu, maske iha kuartu mak keta-ketak.
“Timor-Leste mak uma boot ida hodi halibur ita hotu maske iha kuartu mak keta-ketak. Ida-ne’e atu dudu maun-boot sira hodi ko’alia ba malu lori nasaun ne’e ba oin tanba ita uma ida de’it kuartu mak keta-ketak,” nia dehan.
Jornalista : Hortêncio Sanchez
Editór : Cancio Ximenes
