g7+ apoiu US$2.000 ba jogu Futeból Sub-12 hodi Komemora Tinan 35 Masakre Santa Krúz iha Vikeke

VIKEKE, 12 Novembru 2026 (TATOLI)—Organizasaun g7⁺ apoiu finanseiru US$2.000 ba Sentru Juventude Munisípiu Vikeke atu realiza Kompetisaun Futeból Sub-12 ba feto no mane, nu’udár parte husi atividade Komemorasaun Tinan 35 Masakre Santa Krúz, ne’ebé akontese iha 12 Novembru 1991.

Diretór Sentru Juventude Munisípiu Vikeke, Januário Benivides de Araújo, hateten katak apoiu finanseiru ne’e permite Sentru Juventude, hamutuk ho Asosiasaun Futeból Munisípiu Vikeke, organiza kompetisaun desportiva ne’e atu marka Komemorasaun Loron Juventude ba da-21 no Masakre Santa Krúz ba da-35.

“Relasiona loron importante rua ne’e, ami hamutuk ho Asosiasaun Futeból Munisípiu Vikeke realiza kompetisaun Futeból Sub-12 ba feto no mane. Objetivu husi kompetisaun ne’e mak atu fasilita joven sira dezenvolve no promove sira-nia talentu iha área desportu,” Januário Benivides dehan ba TATOLI, iha Kampu Futeból Vikeke Vila, Kinta ne’e.

Januário relata katak kompetisaun ne’e envolve klube hamutuk 12, kompostu husi klube mane neen no klube feto neen, ne’ebé partisipa durante loron balun.

Nia afirma katak durante kompetisaun ne’ebé hala’o kuaze semana ida, jogadór sira hatudu disiplina di’ak no laiha problema ruma to’o atividade ramata.

“Ami haree katak durante jogu ne’ebé hala’o kuaze semana ida, jogadór sira hatudu disiplina di’ak no laiha problema ruma to’o ohin ami taka kompetisaun. Iha tempu uluk, ita-nia joven Loriku As’uain sira uza sira-nia kbiit no korajen atu defende rai ida-ne’e. Agora, jerasaun foun tenke uza sira-nia kbiit no talentu atu dezenvolve desportu iha Munisípiu Vikeke, iha nivel nasionál no internasionál,” nia hato’o.

Iha serimónia enserramentu, Prezidente Autoridade Munisipál Vikeke, Francisco Cruz Simões de Gonzaga Soares, husu ba jerasaun foun atu la haluha istória luta no sakrifísiu ne’ebé povu Timor-Leste enfrenta inklui Masakre Santa Krúz iha 12 Novembru 1991.

Nia subliña katak independénsia ne’ebé Timor-Leste hetan ohin loron mai husi sakrifísiu no luta husi jerasaun uluk, nune’e juventude tenke kontinua kontribui ba dezenvolvimentu nasaun.

“Tanba ne’e, ha’u husu ba jerasaun foun atu labele haluha istória. Dalan ne’ebé ita hetan ohin loron maihusi sakrifísiu no luta husi ita-nia as’uain sira. Ita iha priviléjiu tanba hetan ona independénsia. Tanba ne’e, ha’u husu ba joven sira hotu atu prenxe ukun-rasik-an ne’e ho dezenvolvimentu, hatudu toleránsia, hadomi malu no respeita família sira,” nia hato’o.

Iha fatin hanesan, Reprezentante Komité 12 Novembru Rejiaun II Vikeke no Baukau, Emídio Amaral, hato’o agradese ba Organizasaun g7⁺ tanba apoiu finanseiru ne’ebé fó ba Sentru Juventude Munisípiu Vikeke hodi realiza kompetisaun futeból nu’udár parte husi komemorasaun Masakre Santa Krúz.

“Ha’u hato’o agradese ba g7⁺ ne’ebé fó apoiu finanseiru ba Vikeke atu realiza atividade desportiva ida-ne’e hodi komemora loron istóriku Masakre Santa Krúz. Liuhusi atividade sira hanesan ne’e, joven sira bele aprende no hatene di’ak liután istória luta ba ukun-rasik-an,” nia subliña.

Kompetisaun futeból sub-12 ne’e envolve klube hamutuk 12, ho klube feto neen no klube mane neen. Organizadór sira prepara prémiu osan ba klube vensedór sira iha kategoria feto no mane, ho montante hanesan: primeiru-lugár simu US$100, segundu-lugár US$75 no terseiru-lugár US$50.

Klube sira-ne’ebé partisipa mak SG 03 Uma-Ki’ik, Sentru Beloi A, Sentru Beloi B, Hakmatek, Kombui no Sentru Juventude, idaidak ho ekipa feto no mane.

Iha kategoria mane, klube Sentru Beloi A hetan primeiru-lugár, Sentru Beloi B okupa segundu-lugár no Kombui hetan terseiru-lugár.

Enkuantu iha kategoria feto, Sentru Beloi B hetan primeiru-lugár, Hakmatek okupa segundu-lugár no Kombui hetan terseiru-lugár.

Serimónia enserramentu kompetisaun ne’e partisipa husi ekipa g7⁺, Polísia Nasionál Timor-Leste (PNTL) Munisípiu Vikeke, autoridade lokál, komunidade no juventude husi Postu Administrativu Vikeke Vila.

Kontestu

Masakre Santa Krúz akontese iha 12 Novembru 1991, bainhira forsa militár Indonézia halo tiru ba manifestante timoroan sira-ne’ebé hala’o manifestasaun no prosesaun husi Igreja Motael bá Semitériu Santa Krúz, iha Dili.

Akontesimentu ne’e sai nu’udár momentu importante iha istória luta povu Timor-Leste ba independénsia, liuliu tanba partisipasaun no sakrifísiu Juventude Loriku As’uain sira.

Iha tinan 2026, komemorasaun ba da-35 la’ós de’it atu hanoin hikas vítima no sakrifísiu jerasaun uluk, maibé mós atu enkoraja jerasaun foun atu komprende istória luta libertasaun no kontinua kontribui ba dezenvolvimentu nasionál. Atividade desportiva hanesan kompetisaun futeból iha Vikeke sai nu’udár meiu ida atu promove talentu juventude, hametin unidade no tranzmite valór istóriku 12 Novembru ba jerasaun foun.

Klik notísia relevante sira iha kraik hodi lee:

1. Kalan reflesaun: Hanoin hikas sakrifísiu Juventude Loriku Aswa’in 12 Novembru 1991 – Kontestu kona-ba sakrifísiu juventude iha Masakre Santa Krúz no komemorasaun ba da-35.
2. Komité 12 Novembru husu ME atu integra istória Masakre Santa Krúz iha kurríkulu nasionál – Importánsia atu transmite istória Masakre Santa Krúz ba jerasaun foun liuhusi edukasaun.
3. Ho Espíritu Juventude 12 Novembru nian, Lori ita Hamutuk ba Harii Pás – Tema no objetivu komemorasaun Loron Nasionál Juventude no Masakre Santa Krúz iha 2026.
4. MJDAK aloka US$4.000 ba Sentru Juventude Vikeke komemora aniversáriu 12 Novembru ba dala-35 – Informasaun kona-ba apoiu orsamentu ba Sentru Juventude Vikeke atu hala’o atividade komemorasaun iha postu administrativu lima.

Jornalista: Vitorino Lopes da Costa

Editór: Xisto Freitas da Piedade