VIKEKE, 07 Outubru 2025 (TATOLI)—Administradór Postu Administrativu Vikeke Vila, Munisípiu Vikeke, Leopoldo da C. Alves, husu Ministériu Obra Públika (MOP) atu hadi’a ponte Dilór husi Diresaun Vikeke bá Same no Manatutu tanba ponte aat tinan barak ona.
“Ita-nia komunidade husi Suku Luka, Postu Vikeke Villa, Munisípiu Vikeke rekomenda ba MOP atu hadi’a ponte Dilór hodi ita-nia komunidade asesu. Ponte ne’e ministru haree rasik ona ninia kondisaun atuál la di’ak. Tan ne’e mak ami husi MOP fó-atensaun ba ponte referidu,” Leopoldo da C. Alves hateten iha Postu Vikeke Vila, Tersa ne’e.
Autoridade Vikeke ne’e haktuir katak tempu uluk ponte Dilór sei di’ak populasaun husi Luka no Lakluta liuhusi ponte ne’e bá Dili, Manatutu no Same besik liu, maibé agora aat tiha tempu udan labele ultrapasa iha ponte.
“Ida-ne’e Governu presiza tau konsiderasaun, atu ita-nia populasaun bele uza fali ponte Dilór bá Manatutu no Same besik liu. Duké liuhusi Vikeke ho distánsia ne’ebé do’ok,” nia tenik.
Iha fatin hanesan, Ministru Obra Públika, Samuel Marçal rekoñese husi Dilór to’o Luka presiza ponte no halo normalizasaun estrada liga bá Natarbora.
“Ohin ha’u mai haree hela estrada liga bá Natarbora. Ha’u la promete maibé ha’u fiar katak iha ha’u-nia fuan. Antes ha’u sai husi ministru ha’u haree netik alkatraun husi parte ne’e to’o bá Natarbora,” nia garante.
Ponte Dilór ne’ebé liga bá Natarbora husi Munisípiu Manatutu hetan estragu husi mota nune’e transporte sira tenke liuhusi mota, maibé tempu udan difikulta komunidade nia movimentu.
Jornalista: Vitorino Lopez da Costa
Editór: Xisto Freitas da Piedade
