DILI, 07 Outubru 2025 (TATOLI)-Banku Nasionál Komérsiu Timor-Leste (BNCTL, sigla portugés) anunsia ba kliente sira katak hahú iha loron 10 Outubru 2025 sei lansa sistema foun Sosa Pulsa Eletrisidade (EDTL) liuhusi Internet & Mobile Banking BNCTL nian.
Tuir dokumentu ne’ebé Tatoli asesu ohin, servisu ida-ne’e fasilita no oferese asesibilidade boot ba kliente sira hotu. Sistema ka feature foun ne’e permite kliente sira sosa pulsa eletrisidade iha kualkér fatin, kualkér momentu no la presiza dezloka bá edifísu EDTL ka ajénsia ruma ne’ebé forma ho liña naruk.
“Ami enkoraja kliente hotu-hotu atu rejista servisu Internet & Mobile Banking iha sukursál, ajénsia ka unidade BNCTL ne’ebé besik liu imi hodi hafásil imi-nia moris”, Marcelo da Cruz Carvalho, Prezidente Komisaun Ezekutiva BNCTL hato’o iha komunikadu ne’e.
Inisiativa ne’e reflete BNCTL nia kompromisu ba servisu bankáriu dijitál no apoia GovernuTimor-Leste nia vizaun ba inkluzaun finanseira no transformasaun dijitál.
Tuir nia, ho meiu ne’e, BNCTL fasilita kliente no komunidade sira-nia moris loroloron, sosa pulsa eletrisidade lais, seguru, fásil no konveniente liu.
BNCTL nafatin kompromete hodi espande sistema finanseiru dijitál hodi tulun kliente sira no garante inkluzaun finanseira ba timoroan hotu.
Aleinde sosa pulsa eletrisidade, aplikasaun Internet/Mobile Banking BNCTL mós oferese feature foun hanesan pagamentu taxa aduaneira, transferénsia osan entre konta BNCTL, konsulta saldo, konsulta estratu bankária no servisu seluk.
TATOLI
