AINARU, 13 Outubru 2025 (TATOLI) — Prezidente Autoridade Munisípiu Aileu, João Bosco dos Santos hateten katak Autoridade otimísta tebes atu prepara kondisaun hotu-hotu hodi hakat ba Kámara Munisipál iha tinan-2026, maski enfrenta limitasaun iha parte kompeténsia no orsamentu.
“Ita otimista tebes atu jere rasik ita-nia komunidade (Munisípiu), maibé kompeténsia ne’e seidauk mai tomak, tanba Ministériu barak sira seidauk fó delegasaun territoriál. Entaun Autoridade Munisípiu seidauk iha kompeténsia tomak atu bele jere hotu-hotu,” nia hatete ba TATOLI iha programa TATOLI Hakbesik, Segunda ne’e iha Pouzada Maubisse.
Autoridade másima Munisípiu Aileu ne’e esplika katak iha avaliasaun minímu ne’ebé Ministériu Estatál halo, Aileu sei tama hela iha kategória C, bube’e sei kontinua prepara nune’e ba loron 20 Maiu 2026, munisípiu ne’ebé prienxe kritériu sei hakat ba Poder Lokál.
PAM Aileu ne’e mós deklara , Aileu kontinua prepara estrutura interna nian hanesan estabelese ona diresaun 19 no departamentu 26 no sei halo preparasaun ho di’ak liután ho orsamentu alokasaun ba 2026 totál millaun $9.
“Departamentu balun seidauk kompleta, maibé ita tenta atu kompleta no aselera edifísiu sira ne’ebé seidauk iha, no sira ne’ebé provizóriu hela. Ba tinan-2026, ita iha de’it 9 millãun orsamentu, no liuhusi osan ne’e ita halo jestãun interna atu reabilita edifísiu sira no mós eskritóriu diresaun,” nia subliña
Prezidente Autoridade ne’e rekoñese mós orsamentu ne’ebé aloka ba Autoridade sufisiente maibé Autoridade Munisípiu sei kontinua halo jestãun interna atu implementa prioridade husi suku, aldeia to’o nível munisípiu. Nia mós konfirma katak Aileu prepara hodi tama ba Kámara Munisípiu iha tempu ne’ebé Ministériu determina.
“Ita labele obriga Governu Sentrál, maibé depende ba ita-nia jestaun interna. Agora, bainhira Kámara Munisípiu mai, mak ita foin bele kontinua ho kompeténsia sira tomak,” nia akresenta.
Liga ba iha área ekonomia, João Bosco dos Santos hateten katak Aileu iha potensíal boot iha agrikultura no turizmu lokál, hanesan Jardin Nicolau Lobato, Lagoa Seloi no bee-manas iha Faturilau.
Nune’e ho 75% populasaun iha Aileu mak agrikultór, Autoridade hakarak ajuda sira atu muda téknika tradisionál ba téknika modernu, maibé prosesu ida-ne’e presiza tempu no apoiu husi ekstensionista, agrikultór sira-nian, no Ministériu relevante.
Maibé, nia lamenta, tanba Ministériu sira barak seidauk fó delegasaun territoriál, Autoridade Munisípiu labele halo kontrola diretu ba projetu no orsamentu.
Ba oin, PAM Aileu ne’e garante katak Munisípiu Aileu sei kontinua prepara kondisaun no hadi’a infraestruturas baziku hanesan estrada, be’e, no edifísiu servisu publik.
“Maski iha limitasaun, ita hein hela no ita otimísta, tanba Aileu hakarak prepara di’ak atu prontu ba tinan-2026,” nia konklui.
Jornalista: Cidalia Fátima
Editór: Rafael Ximenes de A. Belo
