DILI, 14 Outubru 2025 (TATOLI)—Diretór Servisu Edukasaun Munisipál Ainaru, Patrício da Costa Magno, informa Edukasaun Munisipál Ainaru rejista ona estudante finalista hamutuk 2.295 mak sei tuir ezame nasionál iha 20 Outubru 2025.
“Númeru estudante ami foti ona iha semana kotuk no distribui ona ba eskola sira. Nune’e, ita rejistu estudante ne’ebé atu tuir ezame nasionál hamutuk 2.295, ne’ebé kompostu husi Ensinu Báziku Sentrál (EBC) iha 1.527, Ensinu Sekundáriu Jerál (ESJ) iha 659 no Ensinu Sekundáriu Tékniku Vokasionál (ESTV) iha 109,” Patrício dehan ba TATOLI iha resintu Parlamentu Nasionál, Tersa ne’e.
Dirijente ne’e hatutan Edukasaun Ainaru preparadu atu realiza ezame nasionál no agora hein de’it matéria ezame nasionál nian.
“Semana kotuk ita prepara ona estrutura no fó koñesimentu ba Prezidente Autoridade Munisípiu, PNTL no mós fahe ona karta ba PNTL. Buat hotu la’o ho di’ak no ita hein de’it iha loron 15 ba foti pontu ezame hodi halo distribuisaun ba postu sira no iha 20 Outubru hahú ezame,” Patrício haktuir.
Enkuantu, Koordenadór Gabinete Unidade Kurríkulu Nasionál Ministériu Edukasaun, João Maupelu informa ezame nasionál ne’ebé akontese iha 20 Outubru 2025 ne’e, estudante finalista hamutuk 55.902 mak sei partisipa.
“Agora ita tama halo verifikasaun, ne’ebé ho nia prosesu oinoin hanesan halo verifikasaun ba pontu ezame. Kuandu pontu ne’e loos ona, ita hatama ba sira iha lay out halo finál, depoiz tama ba iha imprime,” Maupelu hateten.
João akresenta bainhira imprime hotu, sei ba halo verifikasaun, sei koloka tuir dixiplina ho eskola idak-idak, depoiz iha 01 Outubru halo ona pakotamentu no iha 17 Outubru ne’e distribui ona pontu ezame nasionál ba eskola sira.
Jornalista: Osória Marques
Editór: Xisto Freitas da Piedade
