DILI, 14 Outubru 2025 (TATOLI)—Konsellu Munisipál Kombatente Libertasaun Nasionál (CMCLN-sigla portugeza) Baukau hahú reverifika lista reklamante kombatente ne’ebé antes ne’e hato’o reklamasaun ba komisaun verifikadór.
Prezidente CMCLN Baukau, Fernando Beredu’u Gusmão esplika reverifikasaun referida bazeia ba despaxu Ministériu Asuntu Kombatente Libertasaun Nasionál (MAKLN) ne’ebé fó-sai ba Konsellu Nasionál Kombatente Libertasaun Nasionál (CNCLN) hodi reverifika reklamante veteranu husi tinan 2003, 2005 no 2009 ne’ebé antes ne’e submete ona karta kontestasaun tanba la satisfasaun ho durasaun tempu ne’ebé fó-sai husi Governu.
“Presiza sasin na’in-rua no akompaña ho responsabilidade maibé sira-ne’ebé idozu ona labele la’o, nia responsabilidade de’it mak mai,” Prezidente CMCLN Baukau informa ba TATOLI liuhosi telefónema, Tersa ne’e.
Beredu’u relata maioria kombatente kontesta tanba la sastifáz ho tempu dedikasaun liuliu kategoria hanesan 0-3 no 3-7 iha-ne’ebé hakarak muda ba 8-14 no 15-19.
Mezmu nune’e, CMCLN Baukau husu reklamante sira tenke prenxe rekizitu sira hanesan aprezenta sasin, responsabilidade inklui prenxe formuláriu.
“Iha karta kontestasaun sira mak hakerek rasik, maibé ami sei haree sira hakerek ne’e,” Beredu’u akresenta.
Entretantu, tuir dadus, totál reklamante husi Munisípiu Baukau hamutuk 6.735 ho durasaun tempu fulan-ida hahu husi Outubru no sei termina iha meiadu Novembru.
Jornalista: Natalino Belo
Editór: Xisto Freitas da Piedade
