KOVALIMA, 29 Outubru 2025 (TATOLI)-Autoridade komunitária sira iha munisípiu Kovalima, to’o ohin seidauk bele finaliza prosesu elaborasaun perfíl kada suku hodi submete ba servisu autoridade munisípiu Kovalima.
Servisu autoridade munisípiu Kovalima iha fulan-setembru 2025 fó ona orientasaun ba kada suku atu aprenzenta perfíl suku iha ne’ebé sei akumula dadus populasaun, rekursu umanu, rekursu natural, istória suku, kultura no seluk tan, maibé to’o oras ne’e Xefe suku sira seidauk submete dadus ne’e ba munisípiu tuir data tenke submete iha fulan-Outubru.
“Ami seidauk finaliza elobora perfíl kada suku ida-idak, tanba durante fulan ida nia laran hala’o viajen hela de’it hodi tuir enkontru munisipál, postu administrativu no mós bá nasionál nune’e maka halo ami laiha tempu,” dehan Xefe Suku Belakasak, postu administrativu Maukatar, Leonito Gusmão ba TATOLI, iha AMC, ohin.
Nia hateten atu elabora dadus ne’e maka autoridade komunitária persiza kria sorumutu ho komunidade sira, lia na’in, intelektuál hosi aldeia to’o suku hodi elabora hamutuk opiniaun no dadus hirak ne’e tuir situasaun real iha suku nian antes haruka ba servisu munisipál.
Iha biban seluk, Xefe Suku Zulo, João Lopes de Carvalho, reforsa katak nia parte seidauk finaliza prosesu elaborasaun dadus ne’e tanba okupadu ho servisu administrasaun suku nian.
“Ami seidauk finaliza tanba daudaun ne’e ami okupadu atu hala’o atividade tara bandu no ha’u hasoru difikuldade ha’u-nia funsionáriu apoiu suku na’in-haat la tama servisu atu hala’o planu ne’e oinsá,”nia informa.
Xefe Suku Fohorem, Julio Pereira Alves, hateten servisu tékniku apoiu suku daudaun ne’e elabora hela dadus kona-ba suku Fohorem nian no sei submete ba munisípiu iha tempu badak.
“Ami-nia preokupasaun maka ne’e dadus sira seluk ita bele elabora ho lais tanba rekolla informasaun husi komunidade maibé kona-ba profile suku, tanba sa maka tau naran suku Fohorem ida ne’e ita presiza konvida lia-na’in no intelektuál sira iha suku,” nia hateten.
Lideransa komunitária suku Fohorem ne’e promete iha fulan-dezembru tinan 2025 sei finaliza ona dadus kona-ba perfíl suku nian ba munisípiu tanba foin simu orientasaun iha fulan-Setembru tinan ida ne’e.
Xefe Suku Fatumea ,postu administrativu Fatumea, Sergio do Rego, relata nia parte finaliza ona dadus balun hosi perfíl suku ne’e, maibé sei falta maka istória kona-ba suku Fohorem ne’ebé persiza halibur lia-na’in sira atu tau hamutuk idea kona-ba asuntu ne’e iha tempu besik.
“Ita hatene razaun maka tau naran suku Fatumea persiza atu halibur lia na’in-sira iha Fatumea maka bele fó konta istória nune’e bele fó informasaun ho detallu no mós intelektuál sira hodi tau idea hamutuk,”nia esplika.
Xefe Suku Usecai, António da Silva, esplika hosi ninia parte mós seidauk finaliza perfíl kona-ba suku hodi submete ba munisípiu tuir data tenke finaliza iha fulan-Outubru 2025.
“Ha’u-nia funsionáriu apoiu suku na’in haat hala’o hela servisu maibé, hanesan kolega xefe suku sira seluk hato’o ona sira nia opiniaun atu kompleta persiza halibur lia-na’in no intelektuál bele halo kompleta liu hodi hatúr istória ho loloos,” nia dehan.
Entertantu, munisípiu Kovalima iha postu Administrativu neen, maka postu administrativu Fatululik, Fatumea, Fohorem, Tilomar, Maucatar, Suai no Zumalai ho suku 30 no mós aldeia 148.
Jornalista:Celestina Teles
Editór:Florencio Miranda Ximenes
