DILI, 05 Novembru 2025 (TATOLI)—Governu liuhusi deklaran Primeiru-Ministru, Kay Rala Xanana Gusmão ne’ebé akompañadu husi entidade Governu sira seluk iha debate jeneralidade Orsamentu Jerál Estadu (OJE) 2026, afirma prezensa Banku Nasionál Dezenvolvimentu Timor-Leste (BNDTL) sai hanesan pilár fundamentál ekonómika Timor-Leste nian.
Notísia Relevante: Xanana: Estabelesimentu BNDTL hanesan pasu estratéjiku atu harii ekonomia ida forte
Primeiru-Ministru hateten, Governu kontinua komprometidu ho diversifikasaun ekonómika no kriasaun empregu hamutuk ho reforsu kapitál sosiál no investimentu iha infraestrutura.
“Atu konkretiza vizaun ne’e, ami estuda hela instrumentu finanseiru ne’ebé bele kontribui hodi kria kondisaun hanesan finansiamentu ba longu prazu iha investidór nasionál,” Primeiru-Ministru hateten iha diskursu debate OJE 2026 iha faze jeneralidade iha PN, ohin.
Iha fulan hirak liubá, Governu aprova ona kriasaun BNDTL ne’ebé sei apoia investimentu produtivu no fomenta kreximentu ekonómiku husi setór privadu, enkuantu BNDTL ne’e hetan inspirasaun husi mellór prátika internasionál, ne’ebé hakarak finansia projetu ho impaktu ekonómiku no sosiál ne’ebé aas tebes liuliu iha área prioritária sira hanesan agrikultura, turizmu, indústria transformadora, infraestrutura ho servisu sosiál.
“Bainhira banku ida-ne’e promove asesu ba kréditu, entaun ita la’ós de’it dinamiza setór produtivu, maibé mós reforsa koesaun territoriál ho inkluzaun sosiál,” nia hateten.
Banku Nasionál Desenvolvimentu ne’e mós sei sai hanesan pilár fundamentál ida ba futuru ekonómiku nasaun ne’e nian nomós iha inisiativa Governu kona-ba dijitál ne’ebé sei permite presizaun boot-liu iha verifikasaun kona-ba benefisiáriu sira no halo kontrola metin liu iha folla pagamentu iha transferénsis osan, ho sistema modernu husi nformasaun banku ho fornesedór ba dineiru movel.
“Normalmente ida-ne’e inklui interoperabilidade ba dadus husi sistema fiskál, aduaneiru, pensaun ho rejistu sivíl, ne’ebé reforsa kumprimentu hodi habelar baze de reseita,” nia hatutan.
Notísia Relevante: BCTL sei fó lisensa ba estabelesimentu BNDTL iha tinan oin
Jornalista : Alexandra da Costa
Editór : Cancio Ximenes
