DILI, 01 Novembru 2025 (TATOLI) –Prezidente no Laureadu Nobel ba Pás, J. Ramos-Horta, hato’o ninia tristeza profunda bá falesimentu Sua Majestade Liurai-feto Sirikit, Inan Liurai-feto Tailándia nian.
Prezidente Ramos-Horta haruka ona mensajen kondolénsia formál ida ba Sua Majestade Liurai Maha Vajiralongkorn, Família Reál, no povu Reinu Tailándia nian, hodi hato’o simpatia no solidariedade profunda husi povu Timór-Leste.
Iha Ninia mensajen formál, Prezidente Ramos-Horta hateten, “Sua Majestade Liurai-feto Sirikit Inan Liurai-feto sei hanoin hikas la’ós de’it ba ninia prezensa no elegánsia nobre, maibé liuliu ba ninia kompromisu ne’ebé la kole atu hadi’a moris-di’ak komunidade rurál sira-nian, fó kbiit ba feto sira, no prezerva arte no tradisaun kulturál Tailándia nian, no mós ba ninia papel maternal nu’udar fonte inspirasaun no unidade ba nasaun. Ninia ezemplu sei kontinua fó naroman ba jerasaun sira iha futuru,” refere nota imprensa ne’ebé TATOLI asesa, sábadu ne’e.
Prezidente Ramos-Horta konklui nia mensajen ho orasaun ba Família Reál no povu Tailándia nian, hodi dezeja sira konsolasaun no serenidade durante períodu lutu nasionál ida-ne’e.
Prezidente hato’o nia esperansa katak memória husi Sua Majestade Liurai-feto Sirikit Inan Liurai-feto sei dura nu’udar símbolu domin, servisu, no dedikasaun ba Reinu no ninia povu.
Sirikit moris Mom Rajawongse Sirikit Kitiyakara, 12 Agostu 1932 no hakotu Iis iha 24 Outubru 2025) nu’udar membru ida hosi família liurai Tailándia nian ne’ebé mak sai Liurai-feto Tailándia nian hosi 28 Abril 1950 to’o 13 Outubru 2016, nu’udar feen hosi Liurai Bhumibol Adulyade. Nia maka Liurai Vajiralongkorn nia inan.
TATOLI
