DILI, 04 Novembru 2025 (TATOLI)-Konsellu Ministru aprova projetu Rezolusaun Parlamentu Nasionál (PN) kona-ba ratifikasaun Deklarasaun Admisaun Repúblika Demokrátika Timor-Leste ba Asosiasaun Nasaun Sudeste Aziátiku (ASEAN).
Tuir dokumentu Governu ne’ebé Tatoli asesu, proposta referida aprezenta husi Ministru Negósiu Estranjeiru no Kooperasaun, Bendito dos Santos Freitas.
“Proposta Rezolusaun ida-ne’e ho intensaun atu ratifika Deklarasaun kona-ba Admisaun Repúblika Demokrátika Timor-Leste ba ASEAN, ne’ebé asina iha Malázia, iha loron 26 fulan-Outubru tinan 2025, durante serimónia adezaun plena Timor-Leste nian ba organizasaun rejionál ne’e”, dokumentu ne’e haktuir.
Deklarasaun ne’e reprezenta aseitasaun polítika husi Estadu-Membru ASEAN kona-ba inkluzaun Timor-Leste nian nu’udar Estadu-Membru plenu direitu, tuir númeru 4 artigu 6.º husi Karta ASEAN, ne’ebé nu’udar etapa esensiál ida ba integrasaun plena Timor-Leste nian iha mekanizmu no estrutura sira organizasaun nian.
Notísia relevante: PN sei ratifika adezaun TL ba Karta ASEAN no Deklarasaun kona-ba Admisaun
Jornalista: Arminda Fonseca
Editora: Maria Auxiliadora
