ASEAN Media Forum 2025 destaka papél mídia promove inkluzividade no sustentabilidade

KUALA LUMPUR, 06 Novembru 2025 (TATOLI) – ASEAN Media Forum (AMF) 2025 ou ba dasia hahú ofisialmente iha Kuala Lumpur, Malázia, iha Kinta-feira (06/11) ho tema “Inkluzividade no Sustentabilidade”.

Fórum anuál ida-ne’e fornese plataforma ida ba profisionál sira mídia nian, peritu sira komunikasaun nian, no líder opiniaun públika sira hosi estadu membru ASEAN hotu-hotu atu troka hanoin kona-ba dezafiu no oportunidade sira ba mídia iha hametin integrasaun rejionál. Tinan ida-ne’e, ida-ne’e konta ho reprezentante na’in 20 hosi nasaun 11 ASEAN nian.

Sekretáriu-Jerál ASEAN, Kao Kim Hourn, subliña importánsia hosi kolaborasaun besik entre ASEAN no mídia iha divulgasaun informasaun ne’ebé loos no harii komprensaun públiku kona-ba assuntu rejionál sira.

“Atu garante katak públiku komprende rezultadu sira, desizaun sira, no kompromisu sira ne’ebé halo hosi Estadu-membru sira ASEAN nian, kooperasaun besik ho mídia sira maka krusiál. Fórum Mídia ASEAN nian serve hanesan ponte ida entre ASEAN no públiku”, hatete hosi Kao Kim iha DoubleTree by Hilton, Kuala Lumpur, Kinta ne’e.

Nia hatutan, AMF, ne’ebé lansa uluk iha tinan 2017 hosi Sekretariadu ASEAN nian, sai hanesan plataforma prinsipál ida hosi ASEAN nian hodi halo interasaun ho komunidade mídia nian.

Fórum ne’e halibur xefe-editór sira, jornalista seniór sira, no figura mídia sira hosi setór oioin, hosi mídia imprime no transmisaun to’o mídia sosiál, hodi envolve iha diálogu nakloke no konstrutivu ho ema sira ne’ebé halo polítika, akadémiku sira, no líder emprezariál sira iha rejiaun.

“Fórum ne’e la’ós de’it ko’alia kona-ba realizasaun sira ASEAN nian maibé destaka mós dezafiu sira ne’ebé maka rejiaun ne’e hasoru hodi aborda mudansa global. Mídia sira iha papél krusial ida hodi harii konfiansa, hametin komprensaun públiku nian, no hasoru aumentu dezinformasaun nian ne’ebé maka aumenta, liuliu iha meiu komunikasaun sosiál sira”, Nia hatete.

Nia mós subliña katak sempre iha mudansa lalais iha paizajen globál, bele polítiku, ekonómiku, ka sosiál, mídia tenke sai nafatin fonte informasaun ne’ebé kredível.

“Ita moris iha era gratifikasaun instantaneu, inklui mídia. Maibé, iha ritmu ne’ebé lalais ne’e nia leet, responsabilidade atu divulga informasaun ne’ebé loos sai krusiál liu duké uluk,” Nia subliña.

Iha ninia diskursu prinsipál, Dato’ Zanariah Zainal Abidin, Diretór Jerál Sekretariadu Nasionál ASEAN Malázia, destaka mídia nia papél ativu iha harii Komunidade ASEAN nian. Nia subliña katak mídia la’ós de’it serve hanesan transportadór informasaun, maibé mós hanesan motor ba konxiénsia públika kona-ba identidade fahe ASEAN nian.

“Mídia nia papél la’ós pasivu, maibé proativu. Mídia fornese plataforma krusiál ida ba hasa’e konxiénsia públiku kona-ba ASEAN no aprofunda komprensaun transfronteirisu.Konteúdu ne’ebé publika sai hanesan ponte entre polítika no povu nia moris,” Nia hateten.

Dato’ Zanariah mós destaka importánsia hosi inkluzividade dijitál atu nune’e narrativa ASEAN nian bele to’o ba komunidade sira ne’ebé dook no la hetan atendimentu.

“Ita tenke garante katak lian hotu-hotu halo parte iha narrativa ASEAN nian. Aleinde estatístika komérsiu no infraestrutura nian, mídia mós presiza destaka istória umanitária sira, kolaborasaun juventude nian, no reziliénsia komunidade nian, ne’ebé sai hanesan fundasaun ba parseria sustentável sira ASEAN nian,” Nia akresenta.

Iha forum ne’e partisipa mós husi Embaixadór Alemaña iha Malázia, Silke Riecken-Daerr, ne’ebé hato’o apoiu hosi Governu Federál Alemaña liuhosi Deutsche Gesellschaft für Internationale Zusammenarbeit (GIZ) ba organizasaun eventu ne’e, afirma katak parseria ne’e reflete kompromisu Alemaña nian hodi hametin komunikasaun públika ne’ebé inkluzivu no sustentável iha rejiaun Sudeste Aziátiku.

Iha sesaun dahuluk, ho títulu “Dinámika Ekonómika Globál no Impaktu Jerál sira iha ASEAN,” oradór proeminente sira, inklui Tan Sri Rebecca Sta Maria (eis-Diretór Ezekutivu APEC), Julian Neo (Prezidente Diretór DHL Express Malázia), no Erica Tay (Diretora Makro Peskiza Maybank), diskute impaktu hosi mudansa ekonómiku sira Singapura nian iha kompetitividade globál AANSE nian. Panelista sira destaka nesesidade ba estratéjia koletiva ida iha nivel rejionál hodi rezolve inserteza ekonómika globál no promove kreximentu inkluzivu no sustentável.

Sesaun espesiál, “Konversa ho Prezidente ASEAN,” konta ho YB Liew Chin Tong, Vise-Ministru Investimentu, Komérsiu, no Indústria Malázia nian, no Dato’ Zanariah Zainal Abidin, Diretór Jerál Sekretariadu Nasionál ASEAN-Malázia nian. Iha sesaun, sira na’in rua destaka realizasaun xave sira durante Malázia nia lideransa nu’udar Prezidente ASEAN 2025 no subliña importánsia hosi mídia hodi hametin komunikasaun transfronteirisu no habelar partisipasaun públika iha asuntu sira ASEAN nian.

Asuntu kona-ba adezaun foun Timor-Leste nian destaka mós iha painél daruak, “Husi Viziñu ba Membru ASEAN.” Painél ida-ne e diskute Timor-Leste nia prosesu integrasaun ba ASEAN no nia impaktu ba dinámika rejionál.

Oradór sira inklui Natércia Coelho da Silva (Reprezentante Permanente Timor-Leste ba ASEAN), Insa Ewert (Delegasaun Uniaun Europeia ba Malázia), Arividya Arimuthu (ISIS Malázia), no Joanne Lin (ISEAS–Yusof Ishak Institute). Panelista sira subliña katak adezaun Timor-Leste nian sei hametin valór sira ASEAN nian kona-ba hamutuk no inkluzividade hodi hasoru dezafiu globál sira. 

Jornalista : Cidalia Fátima

Editora     : Armandina Moniz