DILI, 04 Outubru 2025 (TATOLI)-Parlamentu Nasionál (PN) sei realiza, entre loron 05 no 07 Novembru 2025, debate ba proposta Orsamentu Jerál Estadu (OJE) 2026 iha faze jeneralidade.
Tuir ajenda ne’ebé Ajénsia Tatoli asesu, ohin, husi PN katak, iha giaun, Primeiru-Ministru, Xanana Gusmão, mak inisia debate hodi aprezenta proposta lei, no tuirmai Komisaun C ba Asuntu Finansa Públika aprezenta ninia relatóriu no pareser.
Períodu debate deputadu sira no Governu halo intervensaun tuir tempu ne’ebé determina husi bankada parlamentár.
Tuir rejimentu Parlamentu iha artigu 105 iha númeru 1 hateten diskusaun jeneralidade foka ba prinsípiu no sistema projetu lei idaidak nian.
Bainhira aprova ona jeneralidade sei kontinua diskusaun no votasaun iha espesialidade iha loron 13 Novembru ho másimu diskusaun loron sanulu.
Proposta lei OJE ne’e iha artigu hamutuk ualu. Iha espesialidade, sei halo diskusaun no votasaun ba kada artigu.
Ba eventuál proposta alterasaun aprezenta até tuku 12h00 iha loron 11 Novembru. Termina diskusaun iha espesialidade kontinua votasaun iha finál globál.
Lembra katak, iha 01 Outubru, Governu liuhusi Ministériu Finansa submete ona proposta OJE 2026 ho montante billaun $2,291 ba PN.
Notísia relevante: https://tatoli.tl/2025/10/01/governu-aprezenta-ona-proposta-lei-oje-2026-ba-parlamentu-nasional/
Jornalista: Nelson de Sousa
Editora: Maria Auxiliadora
