DILI, 06 Novembru 2025 (TATOLI)—Antigu Alunu ba Programa Kooperasaun Téknika Malázia (MTCP, sigla inglés), Kinta ne’e, oferese kadeira neen ba Postu Saúde Bebonuk no Manleuana, ne’ebé oferese direta husi Embaixadór Malázia iha Timor-Leste, Amarjit Singh ho nia ekipa.
Portavós MTPC, José Violante informa, inisiativa ne’e atu pasiente sira bainhira halo konsulta bele tuur.
“Kada tinan ita iha inisiativa fó apoiu ba komunidade iha área rurál sira-ne’ebé presiza tulun iha área oioin, tinan kotuk ita apoiu konstrui bee-moos ba komunidade iha Likisá no tinan ne’e ita apoiu fali iha setór saúde, nune’e ohin ita entrega banku neen, tolu ba Postu Saúde Bebonuk no tolu iha Postu Manleuana,” Portavós hato’o ba Agência TATOLI iha Postu Saúde Manleuana.
Notísia relevante : Autoridade Ossorua solisita MS konstrui postu saúde
Nia dehan, atividade ne’ebé sira halo sei kontinua tanba MTPC rasik iha membru hamutuk 1.000-resin, ne’ebé akumuladu dezde tinan 2003 to’o agora no agora namkari iha instituisaun Governu.
“Ha’u hanoin katak ho númeru membru ne’ebé boot tenke kontribui buat ida rai ida-ne’e, aleinde ita kontribui ba parte Governu liuhusi ita-nia knaar, maibé mós buat ne’ebé ita bele halo liuhusi Embaixada Malázia hamosu inisiativa apoiu ba ita-nia komunidade, liuliu iha setór saúde nian,” nia akresenta.
José Violante dehan, objetivu prinsipál husi atividade ne’e mak atu hametin relasaun di’ak entre Malázia liuhusi ninia Embaixada ho Antigu Alunu MTPC rasik.
“Ami-nia esperansa mak espera ba oin bele hamosu inisiativa seluk, apoiu ba ita-nia rai liuhusi setór saida de’it, tanba daudaun ami-nia estrutura mós seidauk estabelese nune’e bainhira estabelese ona, hanoin hamutuk ho Embaixada haree hamutuk setór saida mak bele apoiu,” nia katak.
Iha fatin hanesan, Xefe Sentru Saúde Komoro, Emília de Sousa agradese tebes MTPC nia inisiativa no konsidera importante tebes atu fasilita ba pasiente sira bainhira halo tratamentu saúde.
“Ha’u nu’udar Xefe Sentru Saúde Komoro, orgullu no agradese tebes ba MTPC ne’ebé ohin oferese banku neen, ne’ebé tolu ba Postu Saúde Bebonuk no tolu ba Postu Saúde Manleuana, ida-ne’e sei ajuda tebes ba ita-nia komunidade bainhira atu mai konsulta sira bele tuur, tanba Bebonuk rasik durante ne’e laiha banku ba pasiente sira atu tuur,” nia tenik.
Jornalista : Arminda Fonseca
Editora : Julia Chatarina
