BAUKAU, 01 Maiu 2026 (TATOLI)—Programa Nasionál Dezenvolvimentu Suku (PNDS) liuhusi atividade regulár iha Suku Lavateri, Postu Administrativu Baguia, tinan-ne’e sei reabilita sede suku.
Xefe suku Lavateri, Postu Administrativu Baguia, Domingos da Costa Pereia esplika, estrutura suku hamutuk ho komunidade liuhusi reuniaun konsellu suku konkorda reabilita sede suku tanba inportante hodi halo atendimentu komunidade no sai fatin enkontru.
“Ami atu reabilita sede suku maibé seidauk implementa. Ida-ne’e sai dezafiu ba ami tanba tenke finaliza iha finde tinan-ne’e,” Xefi Suku Lavateri informa ba TATOLI iha Vila Nova, Baukau, Segunda ne’e.
Domingos Pereira relata prosesu administrasaun finaliza ona no tuir planu hahú ona hanesan kuotasaun hodi mobiliza materiál maibé tanba mosu dezentendimentu kona-ba medida obra entre autoridade suku no ekipa PNDS munisípiu nune’e atualmente sei iha konsultasaun.
Líder komunitáriu ne’e argumenta antes ne’e autoridade suku hamutuk ho komunidade inisia konstrui rasik sede suku ho medida metru 12×15 maibé tuir dezeñu ekipa téknika PNDS deside redús medida ba metru 12×9 iha-ne’ebé konsideradu la sufisiente ba atividade suku.
“Ami sei buka solusaun. Karik rezolve ona semana oin ita hahú ona tanba ami hakarak mantein ninia medida anteriór,” Domingos Perreia akresenta.
Entretantu, orsamentu ba atividade regulár PNDS reabilitasaun sede suku tinan-ne’e iha suku Lavateri hamutuk $34.200 iha-ne’ebé sei inklui fasilidade hanesan aula enkontru, fatin ba pesoál apoia suku na’in-haat, pesoál PNDS, Ofisiál Polísia Suku (OPS) inklui xefe suku.
Suku Lavateri hamutuk aldeia lima kompostu husi Fanalolo, Ledana, Onortibalari, Osso Isi-Lari, nk Uabubo ho totál populasaun hamutuk 2.189 kompostu mane 1.079 no feto 1.110 husi uma-kain 522.
Jornalista: Natalino Belo
Editór: Xisto Freitas da Piedade
