DILI, 06 Novembru 2025 (TATOLI)–Prezidente Autoridade Munisipál Baukau (PAM), Veneranda Eurico Lemos Martins konsidera Orsamentu Jerál Estadu (OJE) 2026 ne’ebé prevee ona sei apoia prosesu dezenvolvimentu iha Munisípiu Baukau.
“Mezmu ita-nia proposta ne’ebé submetida la aprova hotu, maibé uitoan ka barak ita tenta utiliza hodi halo dezenvolvimentu ho kuidadu no kualidade para benefísia komunidade,” Prezidente Autoridade Munisipál Baukau informa ba TATOLI iha Parlamentu Nasionál, Kinta ne’e.
Eis deputada ne’e relata orsamentu tinan 2026 nian presiza fó prioridade ba nasaun hodi rezolve problema sosiál, edukasaun, saúde no seluk tan.
AMB propoin orsamentu adisonál hamutuk millaun $16.507.353 ho razaun OJE tinan-2025 sofre ona korte ba saláriu no vensimentu hamutuk pursentu 16, nune’e husu repoin fali atubele paga funsionáriu sira hamutuk na’in-308.
Notísia relevante: AAM Baukau propoin orsamentu adisionál $16.507.353
AMB hetan alokasaun tetu fiskál hosi Ministériu Finansas ho montante $10.388.011 hodi aloka ba Saláriu no Vensimentu $2.363.048, Kapitál Menór $0, Kapitál Dezenvolvimentu 0, Transferénsia Públika $7.445.580, Bens no Servisu $579.383.
Husi orsamentu tetu fiskál referidu, AMB konsidera la sufisiente nune’e propoin tan orsamentu adisionál $16.507.353 ne’ebé sei aumenta ba alokasaun Saláriu no Vensimentu $2.173.093, Kapitál Menór $2.341.995, Transferénsia Públika $1.005.826, Kapitál Dezenvolvimentu $10.716.071, Bens no Servisu $270.378.
Entretantu, totál orsamentu ne’ebé Autoridade Baukau propoin ba KRO hamutuk $26.896.364, hodi aloka ba Saláriu no Vensimentu $4.536.141, Kapitál Menór $2.341.995, Transferénsia Públika $8.451.406, Kapitál Dezenvolvimentu $10.716.071, Bens no Servisu $849.761.
Jornalista: Natalino Belo
Editór: Xisto Freitas da Piedade
