BOBONARU, 12 Maiu 2026 (TATOLI)-Oan-ki’ak na’in-lima husi aldeia Kaku, suku Sanirin, postu administrativu Balibó, munisípiu Bobonaru, hetan apoiu umanitáriu husi Diresaun Sosiedade Sivíl no Asuntu Sosiál, Prezidénsia Repúblika nian, hafoin sira lakon inan-aman iha tempu badak nia laran.
Oan-ki’ak sira ne’e mak Rosalina da Purificação (15), Taufiliana da Purificação (12), Octaviano Maia da Purificação (10), Aida Maia da Purificação (4) no Aliança Maia da Purificação (fulan 3). Sira-nia inan mate iha loron 12 Abríl 2026 no aman husik sira iha 29 Abríl 2026.
Apoiu ne’ebé Prezidénsia Repúblika fó ba família ne’e kompostu husi foos, mina, roupa no osan balun ne’ebé mai diretamente husi Prezidente Repúblika José Ramos-Horta nia bolsu rasik atu ajuda nesesidade urjente labarik sira-nian.
Asesór Sosiedade Sivíl no Asuntu Sosiál, Quintiliano Moniz Carvalho, hateten katak apoiu ne’e tuir orientasaun direta husi Prezidente Repúblika, hafoin simu informasaun liuhusi vídeo kona-ba kondisaun triste oan-ki’ak sira ne’ebé hela mesak hafoin lakon inan-aman.
“Prezidente Repúblika hetan vídeo oan-ki’ak na’in-lima ne’ebé sira-nia inan-aman husik, liuliu labarik bebé foin halo fulan tolu. Prezidente haruka ami mai haree uluk sira-nia kondisaun, tanba Prezidente daudaun halo viajen bá rai-li’ur”, Quintiliano Moniz Carvalho hateten.
Nia esplika katak vizita ne’e atu haree uluk kondisaun reál labarik sira-nian, inklui hahán, saúde no moris loroloron, antes hanoin kria uma mahon ba sira, no tuir mai haree sira-nia estudu, tanba Prezidente Repúblika rasik sei mai haree direta.
Kona-ba edukasaun, Prezidénsia Repúblika sei koordena ho Ministériu Edukasaun atu buka solusaun ba sira. Enkuantu ba nesesidade lorloron, sei koordena ho Prezidente Autoridade Munisípiu Bobonaru atu kada fulan bele apoia ka Prezidénsia Repúblika sei tau matan ba sira.
Quintiliano husu mós ba família no viziñu sira atu fó atensaun no karidade ba oan-ki’ak sira, tanba sira lakon inan-aman ho idade ki’ik. “Família rasik ka viziñu sira tenke iha karidade ne’ebé di’ak ba ita-nia oan sira ne’e, tanba sira mak futuru nasaun ne’e nian”, nia hato’o.
Nia solisita mós ba autoridade lokál sira atu hato’o informasaun kona-ba problema sosiál hanesan ne’e ba Prezidénsia Repúblika no Governu atu halo intervensaun imediata.
Pascoela Pereira dos Santos, ne’ebé agora haki’ak bebé Aliança Maia da Purificação, hateten nia rasik deside simu responsabilidade ida-ne’e tanba haki’ak nia alin nia oan.
“Ha’u haki’ak mak ida ki’ik-oan bebé ne’e. Sira boot na’in-haat ne’e hela ho nia avó feto. Ida ha’u haki’ak ne’e ha’u sei hadomi hanesan ha’u-nia oan rasik no sei haree nia to’o boot”, nia promete.
Nia agradese tebes ba Prezidente Repúblika tanba haruka ekipa mai ajuda oan-kiak sira ne’e iha tempu difísil.
Taufiliana da Purificação, ida husi oan-ki’ak, ho laran-triste konta katak sira agota hela mesak no enfrenta difikuldade boot atu buka hahán no nesesidade loroloron.
“Ami sente triste tebes tanba apá-amá husik hela ami na’in-lima. Amá mate halo semana rua liu, loron rua apa hanoin barak, apa mós mate tuir tiha, soe hela ami na’in-lima mesak. Amá-apá mate tiha, avó osan laiha sosa alin nia susun-been, amá boot mak sosa, ami sei ki’ik haree malu ladi’ak”, nia dehan.
Nia husu ba Prezidente Repúblika atu ba oin tau matan ba sira. “Ajuda ami-nia hahán, hemu, hatais, saúde no eskola. Apoiu Prezidente Repúblika ne’ebé ohin lori mai ne’e ami agradese tebes, kona-ba eskola lori ami bá Dili mós hakarak, nafatin iha Maliana mós ami hakarak”, nia dehan.
Avó feto Decarlina Pereira ne’ebé agora tau matan ba labarik sira hateten esforsa-an atu haree nia beioan sira, maibé tanba idade ona buka osan susar atu fó han hemu labarik sira. “Ha’u husu ba Governu no na’i Prezidente Repúblika bele apoiu labarik sira ne’e”, nia hato’o.
Xefe Suku Sanirin, postu administrativu Balibó, munisípiu Bobonaru, Francisco Reis Tavares, hateten autoridade lokál iha responsabilidade foti sira-nia dadus no hato’o ba Prezidente Autoridade Munisípiu no Solidaridade Sosiál atu hetan apoiu husi Governu. “Prioridade ne’ebé daudaun ami halo mak ajuda saida de’it mak ami bele halo, no husu Governu bele apoiu sira kona-ba saúde, eskola no nesesidade lorloron nian”, nia dehan.
Nia mós husu atu ba Prezidente Repúblika atu haree nesesidade oan-ki’ak sira-nia, inklui uma mahon ba sira.
Jornalista: Arminda Fonseca
Editora: Maria Auxiliadora
