VIKEKE, 20 Novembru 2025 (TATOLI)—Koordenadór Bee Timor-Leste, Empreza Públika (BTL, E.P.) Munisípiu Vikeke, Marito da Costa, informa hahú fulan-Janeiru to’o Novembru 2025 sira rekolla taxa husi konsumidór iha kapitál Vikeke Vila hamutuk $19.853,15 ba kofre Estadu.
“Taxa ba tinan ida-ne’e menus tanba falla husi kanál distribuisaun bee-moos nian ne’ebé kuak iha ra-okos hodi halakon bee nia forsa,” Marito da Costa hateten ba TATOLI iha ninia kna’ar fatin, Beloi, Vikeke, Kinta ne’e.
Daudaun ne’e, nia haktuir, sira instala ona kontadór hamutuk 734 iha Postu Vikeke Vila kompostu husi zona Olobai, Beloi, Kabira-Oan, Boromatan inklui Lamak-Laran.
Marito haktuir, dezafiu ne’ebé BTLVikeke enfrenta mak konxiénsia komunidade utilizadór bee-moos nian selu taxa tanba dalaruma liu fulan tolu ka haat foin selu dala ida.
“Ho argumentu ne’ebé ita-nia kliente sira hato’o ba ami katak fulan ida selu $2 resin de’it, entaun komunidade sira hakarak fulan tolu, fulan haat mak selu dala ida. Kliente balun hetan bee loron ida no loron ida la hetan bee. Ida-ne’e selu taxa to’o fulan tolu, haat mak foin selu. Ida-ne’e mak sai dezafiu ba ami,” nia relata.
Funsionáriu BTL Munisípiu Vikeke hamutuk na’in-14 ne’ebé ativu halo servisu iha Postu Vikeke Vila.
Jornalista: Vitorino Lopes da Costa
Editór: Xisto Freitas da Piedade
