VIKEKE, 25 Novembru 2025 (TATOLI)—Xefe Suku Uma-Ki’ik, Postu Vikeke Vila, Munisípiu Vikeke, Claudino Amaral, informa konstrusaun morru protesaun ba postu saúde husi Programa Nasionál Dezenvolvimentu Suku (PNDS) iha Suku Uma-Ki’ik konkluidu.
“Progresu konstrusaun morru protesan postu saúde Uma-Ki’ik daudaun atinje 100%. Proteje ona ambiente no asegura postu saúde,” Claudino Amaral ba TATOLI iha resintu edifísiu Administrasaun Munisipál Vikeke, Tersa ne’e.
Autoridade Suku Uma-Ki’ik ne’e esplika ezekusuan orsamentu ne’e bazeia ba matadalan PNDS nune’e sempre nakloke ba ema hotu hodi hatene ninia ezekusaun orsamentu ba obra.
Orsamentu PNDS tinan 2025 aloka bá Suku Uma-Ki’ik ba konstrusaun obra morru protesaun postu saude Uma-Ki’ik gasta orsamentu hamutuk $23.396,00.
Obra PNDS ne’e benefísia komunidade Suku Uma-Ki’ik inklui komunidade Suku Uma-Ua’in Kraik. Tuir dadus, populasaun Suku Uma-Ki’ik hamutuk 3.409.
Jornalista: Vitorino Lopes da Costa
Editór: Xisto Freitas da Piedade
