DILI, 15 Juñu 2025 (TATOLI) – Prezidente Institutu Jeosiénsia Timor-Leste (IGTL, sigla portugés), Job Brites, informa katak daudaun seidauk bele halu lutu ka fencing iha área fosíl iha foho Lesululi, suku Meligu, postu administrativu Kailaku, munisípiu Bobonaru, tanba fatin ne’e sei iha hela prosesu dokumentasaun no filmajen sientífika husi BBC Inglaterra.
Nia hateten katak, maski Prezidente Repúblika, José Ramos-Horta, durante nia vizita bá fatin ne’ebá husu atu halo lutu hodi roteje área referida, IGTL no BBC konkorda atu adia medida ne’e temporariamente. Tuir nia, ekipa dokumentáriu hakarak dokumenta kodisaun naturál fatin ne’e, ho objetivu atu asegura katak imajen no dadus sientífiku sira ne’ebé rekolla la sofre mudansa husi konstrusaun ka intervensaun foun ruma.
“Ita halo hela kolaborasaun ho BBC hodi prodús dokumentáriu kona-ba deskobrimentu fósil iha Lesululi. BBC foti ona filmajen dahuluk iha Maiu 2025 no Jullu tinan ne’e sira sei mai fali foti filmajen ikus nian, entaun bainhira foti hotu ona, ita sei prosesa halo muru protesaun”, Job Brites dos Santos hateten ba Tatoli, ohin.
Nia esplika katak projetu dokumentáriu ne’e envolve parseria entre IGTL, BBC hn parseiru husi Suésia no Noruega. Dokumentáriu sientífiku ne’e prevee atu públika iha BBC iha 2027.
Kona-ba prosesu kandidatura foho Lesululi hanesan Jeoparke Mundiál, Job Brites hateten katak IGTL nafatin serbisu hamutuk ho Organizasaun Nasaun Unida nian ba Edukasaun, Siénsia, no Kultura (UNESCO) no parseiru intenasionál sira.
“Serbisu ne’e la’o hela. Ita iha ona kolaborasaun di’ak ho entidade sira husi Portugál, Austrália, nomós UNESCO atu ajuda ami prepara baze legál ida hodi propoin ba ministru bele lori ba iha Konsellu Ministru hodi propoin área ne’e hanesan área protejidu”, nia dehan.
“Serbisu ida-ne’e la’o hela ho di’ak. Ami kolabora ho entidade sira husi Portugál, Austrália no UNESCO hodi prepara baze legál ne’ebé sei permite Governu submete proposta ida ba Konsellu Ministru atu konsidera área ne’e hanesan área protejida,” nia dehan.
Nia subliña katak atu foho Lesululi bele hetan estatutu hanesan protejida, presiza kria dekretu-lei ida hodi garante konseervasaun no protesaun ba patrióniu jeeolójiku ne’e. Tuir nia, preprasaun instrumentu legal sira ne’e daudaun la’o hela.
Notísira relevante: IGTL no UNESCO diskute ona kandidatura foho Lesululi hanesan Jeoparke Mundiál
Jornalista: Arminda Fonseca
Editora: Maria Auxiliadora
