OEKUSI, 25 Novembru 2025 (TATOLI) – Provedória Direitu Umanu no Justisa (PDHJ) Delegasaun Territóriál, Rejiaun Administrativa Espesiál Oekusi Ambeno (RAEOA), tersa ne’e, hala’o enkontru públiku ho kargu xefia husi diresaun sira hotu, hodi atualiza rezultadu promosaun fiskalizasaun no simu keixa durante fulan 11, hahú husi Janeiru mai to’o Novembru 2025.
Diretór PDHJ Oekusi, Bartolomeo Gonçalves, informa, enkontru ne’e hanesan koordenasaun entre entidade sira iha Oekusi, atu partilla rezultadu monitorizasaun, simu keixa, rezultadu investigasaun no rezultadu serbisu sosializasaun ba komunidade sira.
“PDHJ ho nia parseiru sira, ohin organiza enkontru koordenasaun atu atualiza saida mak PDHJ hetan iha terrenu, tan ne’e ita envolve husi Gabinete Prezidente Autoridade no Diresaun sira hotu, mai husi Diresaun Rejionál Infraestrutura, saúde, INSS, edukasaun, rejistu sívil notariadu ho diresaun seluktan, inklui PNDS Oekusi, atu partilla kona-ba serbisu sira-ne’ebé mak sira hala’o, mezmu tempu atualiza kona-ba saida mak PDHJ deteta iha terrenu, atu informa ba sira, sá medida mak foti hasoru problema sira-ne’ebé akontese iha terrenu atu fó solusaun iha tempu tuirmai,” nia hateten iha ámbitu enkontru koordenasaun, hala’o iha salaun PDHJ Oekusi, ohin.
Notísia relevante:KFP-PDHJ deteta funsionáriu balun iha RAEOA manipula lista prezensa
Iha biban ne’e, Diretór Diresaun Rejionál Infraestrutura (DRI), Remigio Nuno Sila, konsidera enkontru ne’e grasa bo’ot ida, tanba PDHJ bele inísia hodi konvida diresaun sira hotu atu bele fó hanoin malu, kona-ba serbisu sira hotu, ne’ebé implementa iha Oekusi.
“Ne’ebé, ha’u hanoin ba futuru, husi parte kompetente sira bele konklui nafatin, atu diresaun sira hotu mai hato’o sira-nia informasaun, tanba keixa barak hato’o direita mai husi komunidade sira, balun mai husi instituisaun independente seluk, ezemplu serbisu DRI nian liga ba infrestrutura sira, entaun liuhusi enkontru ne’e bele fanun diresaun atu toma responsabilidade ho rigorozu, tanba ita nu’udar servidór públiku tenke garante transparánsia iha lala’ok administrasaun públiku, espesialmente iha Oekusi,” nia informa.
Notísia relevante:PDHJ fasilita formasaun ba Konsellu Suku Costa
Iha fatin hanesan, Diretór PNDS Oekusi, João Bobo, agradese tanba obra barak ne’ebé PNDS implementa dalaruma iha irregularidade tanba projetu PNDS kobre hotu komunidade sira iha suku to’o aldeia.
“Ita hotu hatene katak, programa PNDS la’o iha suku 18 kobre hotu aldeia to’o bairru sira, dalaruma iha problema ba projetu sira, entaun karik rezultadu fiskalizasaun PDHJ deteta buat ruma laloos, liuhusi enkontru ofisiál be;e entaun bele rekomenda ba PNDS, oinsa bele hadi’a no buka solusaun ba futuru, tanba enkontru hanesan ne’e foin primeira-ves realiza husi PDHJ, atu fó hanoin ba serbisu sira, tanba ita hotu ezekuta polítika no planu Governu nian ba povu iha rai ne’e, entaun presiza hadi’a atu fó benefisíu direita ba povu,” nia orgullu.
Notísia relevante:PDHJ partilla prinsípiu boa governasaun hodi kombate korrupsaun iha Oé-Cusse
Entretantu, observasaun Jornalista Ajénsia Tatoli,I.P, nota katak, durante enkontru públiku ne’e, PDHJ promove mós diskusaun públiku, husu no hatan liga ba problema infraestrutura ne’ebé abandonadu, tratamentu dokumentu iha notariadu Oekusi, problema pensaun idozu inklui problema tratamentu saúde.
Jornalista: Abílio Elo Nini
Editór: Rafael Ximenes de A. Belo
