OEKUSI, 28 Fevereiru 2025 (TATOLI) – Ekipa konjunta husi Komisaun Funsaun Públika (KFP) no Provedória Direitu Umanu no Justisa (PDHJ), kinta ne’e, hala’o vizita supreza ba edifísiu Estadu sira hodi observa katak funsionáriu balun manipula lista prezensa no balun tama la tuir oras servisu nian.
Objetivu husi vizita supreza ne’e nu’udar asaun husi akordu kuadrulaterál ne’ebé selebra husi KFP, PDHJ, CAC no Inpesaun Jerál Estadu iha 10 Dezembru 2024, atu haree ba asuntu tolu hanesan jestaun rekursu umanu, jestaun patrimóniu ho jestaun finanseiru.
Notísia relevante:PM Xanana husu Autoridade RAEOA-ZEEDOA promove koordenasaun serbisu iha administrasaun públika
“Maibé, ohin ita hahú uluk jestaun rekursu umanu liuliu foku ba lista prezensa ka pontualidade husi funsionáriu sira iha servisu fatin. Iha vizita supreza ba iha Sekretáriu Rejionál Edukasaun Asuntu Sosiál no Diresaun Rejionál Edukasaun inklui Diresaun Patrimóniu Estadu, ita deteta iha manipulasaun lista prezensa, balun tama la tuir oras servisu, mai tarde, maibé asina kedas loron ida nian, balun asina kedas fulan ida nian no balun la tama maibé asina nafatin,” Diretór PDHJ Oekusi, Paulo Ribeiro, informa ba Jornalista hafoin vizita supreza iha Diresaun Patrimóniu Estadu Oekusi, ohin.
Ekipa konjunta halo vizita ne’e atubele garante no hametin kontrolu ne’ebé efikásia ba prezensa funsionáriu sira iha servisu fatin hodi kumpre devér jerál no devér espesiál ne’ebé hatuur iha estatutu funsaun públika nian.
“Ohin, iha servisu edukasaun ita identifika erru balun liliu aktu administrativu sira halo liga ho prezensa funsionáriu públiku iha servisu fatin, balun seidauk to’o oras tuku 17:30, maibé asina ona, no balun asina kedas fulan ida nian, entaun ita nia deskobrimentu ne’e ita sei kompila iha relatóriu hato’o ba superiór atubele rekomenda ba instituisaun Estadu sira oinsá nia mekanizmu no asaun ba aktu sira-ne’e,” nia hateten.
Hafoin deteta, nia dehan: “Meiu ida mak ita halo kedas aprosimasaun no advokasia ba dirijente instituisaun sira atu hadi’a kedas aktu administrativu sira-ne’ebé prátika husi funsionáriu sira”.
KFP presiza sosializa lei pontualidade
Iha biban hanesan, Diretór Edukasaun Oekusi, Vincencio Cono, lamenta no rekomenda ba ekipa konjunta katak molok halo vizita supreza presiza halo uluk sosializasuan ba lei sira, nune’e funsionáriu iha koñesimentu ba lei sira.
“Funsaun públika tenke halo sosializasaun uluk ba kada diresaun tanba oras atu servisu ne’e sira parte administrasaun labele hanesan ho profesór sira, tanba profesór sira uza oras kurríkulu ne’ebé konsagra ona iha kurríkulu nasionál iha nivél hotu ne’ebé profesór balun hanorin ho dadersan balun hanorin iha lorokraik,” nia rekomenda.
Nia fó exemplu, funsionáriu sira iha diresaun edukasaun no parte administrasaun nian tama iha tuku 08:00 dadersan no meiudia tuku 12:30 ba almosu, tuku 14:00 tama fali no sai 17:30, entaun sosializasaun ne’e la’os halo ho inspesaun direita.
“Ha’u nu’udar dirijente la konkorda, di’akliu kada diresaun no Sekretáriu Rejionál tenke halo sosializasaun, atubele apar tanba servisu diresaun edukasaun ne’e iha oin rua balun iha terrenu no balun iha administrasaun,” nia husu.
Entretantu, vizita supreza husi ekipa konjunta ne’e hala’o hahú kedas iha loron 14 Fevereiru 2025 no sei kontinua halo inspesaun ba jestaun patrimóniu no jestaun finanseiru iha instituisaun Estadu sira.
Notísia relevante:KFP pose dirijente foun 159 iha Oé-Cusse, husu atu hatudu integridade
Jornalista: Abílio Elo Nini
Editór: Florencio Miranda Ximenes
