OEKUSI, 17 Fevereiru 2025 (TATOLI) – Primeiru-Ministru, Kay Rala Xanana Gusmão, nota Autoridade Rejiaun Administrativa Espesiál Oekusi Ambeno (RAEOA) iha problema funsionamentu administrasaun tanba falta koordenasaun servisu entre Ekipa Zona Ekonómia Espesiál Dezenvolvimentu Oekusi Ambeno (ZEEDOA),nune’e husu atu promove koodenasaun serbisu iha administrasaun públika.
Xefe Governu hato’o nia observasaun ne’e, bainhira hala’o enkontru ho Autoridade RAEOA, ekipa husi ZEEDOA no Xefe Suku 20 inklui jestór sub-rejiaun haat iha otél Ambeno Oekusi, segunda ne’e.
“Ha’u mai atu ko’alia oituan kona-ba Oekusi, tanba Oekusi la’ós ema ida ka rua de’it nia liman, Oekusi imi-nian liuliu Atoni-oan, ha’u tenke mai haree buat sira-ne’ebé la’o ladún di’ak,” Primeiru-Ministru ko’alia iha ámbitu enkontru referidu, ohin.
Notísia relevante:PM Xanana vizita Oekusi hodi observa progresu serbisu no funsionamentu administrasaun
Xefe Governu relata: “Husi tinan 2014, 2024 to’o agora sai tinan 10 ona, maibe planu ZEESM (ZEEDOA) ida laiha, iha rai bo’ot iha tiha ona planu ida PEDN 2011 to’o 20230, ohin mai iha Oekusi, hanesan ba iha fatin hotu-hotu, maibé RAEOA-ZEESM imi ketak oituan, ida-ne’e atu esplika, bainhira ka’er fali Governu mai haree buat hotu lala’o”.
“Tanba ne’e, sente no rona oituan mós katak, iha problema administrasaun RAEOA no ZEESM nian, ladun iha koordenasaun atu ko’alia ba malu, ida-ne’ebá hakarak halo mesak, ida-ne’e hakarak halo ninian de’it, no ladún iha definisaun katak, o nian mak ne’e, ami-nian mak ne’e, idak-idak la’o nian,” Xefe Governu lamenta.
Nune’e, Xefe Governu husu ba Prezidente Autoridade RAEOA, Rogério Tiago Lobato no Koordenadór ZEEDOA, João Mendes Gonçalves, atu promove unidade iha servisu fatin hodi labele prátika diskriminasuan no iha kór partidu.
“Exemplu, ema feto ida servisu ho ha’u, maibé ha’u la gosta nia, entaun ha’u hasai, depois ha’u bolu fali ema seluk tanba nia partidu seluk, ida-ne’e mak ha’u mai Oekusi, tanba saida mak ha’u tenke mai Oekusi, ohin ita temi ona ZEEMS iha tinan 10 la la’o só iha de’it estrada mak iha Pante Makasar, entaun ha’u mai tanba ida-ne’e, presiza duni atu la’o ba oin, sira na’in-rua (Rogério ho João Gonçalves) ha’u sei hakilar sira.Tanba ne’e, ha’u hakilár imi karik la’ós falta respeitu, tanba raan ho ruin sira mak dehan tenke hakilár imi na’in-rua atu servisu hamutuk,” PM Xanana apela.
Ho razaun hirak ne’e, Primeiru-Ministru dehan sei hela iha Oekusi durante haat hodi hamutuk ho autoridade no populasaun Oekusi hodi hodi hadi’a jestaun liuliu halo hametin koordenasaun serbisu hodi dezenvolve Oekusi.
“Maske tarde ona maibé liu ona, ita kontinua esforsa no servisu maka’as tenke koopera didi’ak, haree malu ba, ne’e mak ha’u mai Oekusi, ha’u mai la’ós atu halimar, ha’u mai atu bolu imi-nia esforsa tomak servisu hamutuk liuliu ba imi Atoni-oan sira,” PM Xanana fó hanoin
Iha fatin hanesan, Prezidente Autoridade RAEOA, Rogério Tiago Lobato, rekoñese durante mandatu tinan ida lidera RAEOA enfrenta problema kona-ba funsionamentu administrasaun no liña koordenasaun.
Notísia relevante:PM Xanana husu Autoridade RAEOA no ZEEDOA jere osan povu ho didi’ak
“Ita foin mak ka’er administrasaun ne’e tinan ida, ita haree seidauk iha koordenasaun di’ak, ita tenke hadi’a tiha kedas, tanba Primeiru-Ministru dehan, antes ka tarde duke nunka, di’ak liu ita hadi’a kedas ba buat ne’ebé seidauk di’ak, duke ita nunka hadi’a,” Prezidente Autoridade ne’e afirma nia hateten.
Nia afirma, Primeiru-Ministru mós ko’alia kona-ba koordenasaun di’ak entre RAEOA ho komisaun ezekutiva ZEEDOA, ne’ebé oras ne’e komisaun sira aprezenta ona relatóriu iha Konsellu-Ministru no seidauk iha finanseiru ba iha administrasaun nian.
“Ha’u hanesan Prezidente Autoridade atu servisu metin liutan ho Komisaun Ezekutiva ZEEDOA, ha’u sente laiha problema tanba koordenadór ZEEDOA ho ha’u ne’e, ami koñese malu kle’ur ona, ne’ebe laiha problema atu servisu hamutuk,” Nnia promete.
Ajenda Xefe Governu iha Oekusi
Tuir ajenda ne’ebé Ajénsia Tatoli, I.P, asesu iha iha loron tersa, 18 Fevereiru 2025, tuku 08 to’o tuku 11:00, Primeiru-Ministru sei hala’o vizita ba Sekretáriu Rejionál sira hotu, no iha tuku 11:00 halo lansamentu ba sistema dijitalizasaun saúde RAEOA no hala’o enkontru espesiál ho funsionáriu sira iha otel Ambeno.
Iha sesaun lorokraik tuku 15:30 Primeiru-Ministru sei hala’o enkontru ho Padre, Madre no oan-ki’ak sira iha salaun parókia igreja Padia’e, iha tuku 16:30 kontinua hala’o vizita ba kuartél F-FDTL Sikone, Kuartél PNTL no edifisíu administrasaun públika RAEOA.
Loron kuarta, 19 Fevereiru 2025, Primeiru-Ministru sei hala’o vizita projetu estrada iha suku Taiboko sub-rejiaun Pante Makasar no kontinua ba sub-rejiaun Nítibe suku Usitako to’o suku Bene-Ufe aldeia Lamasin no Nefolete.
Iha loron kinta, 20 Fevereiru 2025, Primeiru-Ministru sei hala’o fali vizita ba projetu estrada iha sub-rejiaun Oésilo, estrada husi Tono ba Oésilo no kontinua ba sub-rejiaun Pássabe, depois kontinua fali ba estrada sira iha Tumin, Hau-Ana, Ponte-Bitopa, kontinua ba ponte foun Oébaha.
Iha loron sesta 21 Fevereiru 2025, parte dadeersan Primeiru-Ministru sei hala’o observasaun ba funsionamentu barrajén Tono no kontinua vizita ba rezidénsia Fulolo, no kontinua hala’o vizita ba aeroportu Rota do Sândallo, no iha lorokraik Xefe Governu sei viajén fila-fali ba Dili ho aviun Aero Dili.
Notísia relevante:Primeiru Ministru Xanana hala’o enkontru espesiál ho Autoridade RAEOA-ZEESM
Jornalista: Abílio Elo Nini
Editór: Florencio Miranda Ximenes
