OÉ-CUSSE, 07 Outubru 2024 (TATOLI) – Provedoria Direitu Umanu no Justisa (PDHJ), Komisaun Funsaun Públika (KFP), Komisaun Anti-Korrupsaun (CAC) no Inspesaun Jerál Estadu (IGE) disponibiliza formasaun ba funsionáriu públika sira iha Rejiaun Administrativa Espesiál Oé-Cusse Ambeno (RAEOA) oinsá prevene no kombate korrupsaun hodi promove governasaun di’ak no proteje direitu umanu iha serbisu administrasaun públika nian.
Adjuntu PDHJ ba Asuntu Boa Governasaun, Rigoberto Monteiro, hateten formasaun ne’e hala’o durante loron tolu, hahú segunda to’o kuarta semana ne’e, ne’ebé fahe ba ekipa rua ho alvu ba funsionáriu públiku, xefe departamentu no diretór rejionál sira.
“Ita hanesan servidór públiku persiza entende knaar servisu entidade sira-ne’e ein relasaun ho prátika prinsípiu governasaun di’ak iha administrasaun públika”, Rigoberto Monteiro ko’alia iha abertura atividade ne’e, iha salaun administrasaun Numbei Oé-Cusse, ohin.
Notísia relevante: OJE 2025 : PDHJ propoin adisionál millaun $1,5
Tuir nia, dezde Timor-Leste ukun rasik-aan, funsionamentu administrasaun públika sei la’o tarde, nune’e persiza reforsa administrasaun públika ho di’ak, maibé importante liu mak servidór públiku sira atu komungga prátika prinsípiu boa governasaun iha serbisu fatin, nune’e halo atendimentu públiku ida-ne’ebé di’ak ba povu no sosiedade.
Nia fó ezemplu relasiona ho jestaun ba atendimentu públiku mak baibain joven sira bá hein kle’ur atu trata kartaun sidadania, dalaruma ema moras tenke bá tuur kle’ur iha hospitál hodi hein ai-moruk.
“Tan ne’e, ita presiza hadi’a jestaun iha administrasaun públika, nune’e bele halo atendimentu justu no efetivu. Entaun, PDHJ nia knaar ida mak atu partilla prinsípiu governasaun di’ak atu ita-nia servidór públik bele pratika iha knaar fatin hodi garante ita-nia administrasaun públika ho di’ak, nune’e bele prevene korrupsaun no tenke serví ema ho fuan no profisionál. Tanba atu kombate korrupsaun la fásil, maibé atu halo prevensaun bele. Ho ida-ne’e ita-bele halo protesaun ba ita-nia povu nia direitu”, nia hateten.
Iha biban hanesan, Prezidente Autoridade RAEOA, Rogério Tiago Lobato, konsidera divulgasaun ne’e importante atu hasa’e konxiénsia funsionáriu sira-nia, nune’e bele entende prinsíiu boa governasaun hodi kontribui ba hadi’a administrasaun públika iha Oé-Cusse.
“Ita iha Oé-Cusse tenke aprende ho ema ne’ebé hatene. Ba administrasaun públika ne’e importante, tanba ne’e serbisu ida loron-loron tenke iha kontaktu permanente ho públiku. Entaun, tenke halo atendimnetu di’ak ba ema hotu, labele iha korrupsaun”, nia afirma.
Nia fó tan ezemplu liga ba funsionáriu barak mak tama serbisu, maibé loron-loron tuur de’it no asina lista prezensa, depois kada fulan nia simu osan husi Estadu, entaun persiza hadi’a liuhusi divulgasaun lei sira ne’ebé relasiona ho asuntu korrupsaun nian atu ema hotu bele komprende.
“Korrupsaun ne’e la’ós osan de’it, maibé kuandu la atende públiku ho di’ak ne’e mós korrupsaun”, nia subliña.
Notísia relevante: CAC, IJE, PDHJ,KFP halo inspesaun urjensia ba SAMES
Formasaun ne’e hala’o fatin rua, balun iha salaun administrasaun Numbei no seluk iha otél Ambeno hodi envolve funsionáriu públiku ho kargu xefia sira kuaze na’in-70 mak partisipa.
Jornalista: Abílio Elo Nini
Editora: Maria Auxiliadora
