OJE 2025 : PDHJ propoin adisionál millaun $1,5
DILI, 22 agostu 2024 (TATOLI) – Provedór Direitus Umanus no Justisa (PDHJ), Virgílio Guterres, hateten prevedoria propoin orsamentu adisionál millaun $1.5 iha Orsamentu Jerál Estadu 2025.
“Tetu orsamentu ne’ebé ami simu husi Governu ba tinan oin ne’e iha millaun $1.8. Depois de ami halo ajustamentu, halo análize, sente katak orsamentu ne’e la sufisiente ba prevedoria atu halao nia servisu iha área fortalesimentu institusionál no atu dezentraliza prestasaun servisu Prevedoria Direitus Humanus no Justisa iha munisípiu. Tanba ne’e mak ami husu tán osamentu adisionál millaun $1.5”, Virgílio Guterres, dehan ba jornalista sira hafoin halo tiha aprezentasaun orsamentu PDHJ tinan 2025 iha Komisaun Revizaun Orsamentu Polítika iha Ministeriu Finansas Aitarak-Laran, kinta, ohin.
Nia dehan, PDHJ husu osan adisionál millaun $1.5 atu finansia ba estabesimentu pontu fokál PDHJ nia ba munisípiu lima ne’ebé sei hala’o iha tinan oin.
“Ita sei estabese pontu fokál iha munisípiu Ainaro, Suai, Viqueque, Lautem no Ermera”, nia dehan.
Virgílio adianta, estabesimentu pontu fokál PDHJ iha munisípiu atu fó asisténsia servisu ba komunidade iha área rurál ho di’ak liután no atu sosializa servisu PDHJ nia ba komunidade sira atu hatene liután.
Tuir relatóriu ne’ebé PDHJ lansa ba públiku kona-ba koñesimentu públiku ba ba PDHJ no dezempeñu servisu PDHJ, populasaun ne’ebé koñese PDHJ ne’e iha de’it porsentu 33.
“Entaun ho orsamentu adisionál ida-ne’e, ba tinan oin ami atu mellora servisu ne’ebé di’ak liután liuhusi ita-nia pontu fokál sira bele sosializa servisu PDHJ ba komunidade no bele fó asisténsia ba komunidade ho di’ak liután”, nia adianta.
Prevedór ne’e mós salienta katak ho orsamentu adisionál ne’e atu halo akizisaun ba viatura sira PDHJ nian hitu.
“PDHJ iha viatura 21, husi viatura sira ne’e iha karreta 13 mak nia kondisaun ladiak ona tanba nia utilizasaun ne’e liu tinan 10 ona no manutensaun aas demais no ami halo ona pedidu atu tau karreta sira ne’e ba patrimóniu Estadu. Entaun ami husu atu tinan oin ami hakarak sosa karreta hitu”, nia afirma.
Gil dehan, Komisaun Revizaun Orsamentu halo apresiasaun de’it maibé seidauk halo aprovasaun ba orsamentu husi PDHJ nian.
“Laiha posizaun ne’ebé ke dehan sira aprova ka la aprova orsamentu adisionál ne’e. Maibé Prezidente Komisaun Revizaun Orsamentu hanesan mós Primeiru-Ministru, hato’o no fó apresiasaun ba ami-nia aprezentasaun no ba ami-nia justifikasaun ba proposta adisionál ne’ebé ke ami hatama millaun $1.5. Ho apresiasaun husi Prezidente KROP ne’e ami buka atu entende katak bele aprova ami-nia pedidu adisionál ne’e”, nia konklui.
Jornalista: Natalino Costa
Editór : Zezito Silva
