VIKEKE, 04 Dezembru 2025 (TATOLI)—Ministériu Saúde (MS) apoia transporte ambulánsia multifunsaun ho kuantidade ida ba Servisu Saúde Munisipál (SSM) Vikeke hodi reforsa atendimentu moras ba fasilidade saúde sira.
Xefe Departamentu Administrasaun Servisu Saúde Munisípiu Vikeke, Fernando Soares haktuir MS apoia ambulánsia multifunsaun ida ba SSM Vikeke ne’e bazeia ba kondisaun ambulánsia balun aat ona nune’e SSM Vikeke halo pedidu ba MS hodi husu ambulánsia ba Munisípiu Vikeke.
“Tanba ne’e, foin lalais iha Sesta (28/11), Ministériu Saúde lori ona ambulánsia multifunsaun foun ida ba ita, ne’ebé ofisialmente entrega ba Prezidente Autoridade Munisípiu Vikeke, mak entrega ba SSM Vikeke. Husi ambulánsia ne’e atu ajuda atendimentu ba ita-nia komunidade iha área rurál sira,” Fernando Soares ba TATOLI liuhusi telefónika, Kinta ne’e.
Fernando informa husi apoia ambulánsia ida ba munisípiu Vikeke SSM Vikeke bele reforsa ona ambulánsia sira seluk hodi transfere moras sira bá fasilidade saúde.
“Daudaun ne’e ita bele dehan katak ambulánsia sufisiente ba atendimentu moras. Ita-nia ambulánsia ne’e foin lalais entrega ne’e agora iha SSM Vikeke, ita la distribui bá sentru saúde. Ita tau iha munisípiu hodi antisipa, karik ambulánsia ruma falla, ida foun ne’e bele ba ajuda fali,” nia hato’o.
Tuir nia, ambulánsia kompostu husi emerjénsia daudaun hamutuk unidade haat, ida kondisaun aat bele hadi’a, ambulánsiaun miltifunsaun ne’ebé bele tula moras no apoiu operasionál hamutuk unidade 11, maibé unidade tolu (3) mak kondisaun aat.
“Ambulánsia sira-ne’ebé aat ne’e ami para hotu iha servisu SSM Vikeke, seidauk halo manutensaun,” nia tenik.
Jornalista: Vitorino Lopes da Costa
Editór: Xisto Freitas da Piedade
