DILI, 05 Dezembru 2025 (TATOLI)—Diretór Kompras iha Institutu Nasionál Farmásia Produtu Medikamentu (INFPM), Sergio da Costa Belo, informa INFPM sosa ai-moruk iha 2025 ne’e atinje ona 83%.
“Ita-nia kompras medikamentu 2025 ita atinji ona 83%. Agora daudaun kontiner haat mak sei iha hela portu Tibar, entaun medikamentu sira-ne’e kuuaze tama hotu ona,” Diretór Kompras INFPM, Sergio da Costa Belo, hateten ba Agência TATOLI iha nia kna’ar fatin, Kampung Alor, ohin.
Nia esplika, iha 2025 ne’e INFPM kontrata empreza lokál no mós internasionál sira mak sosa ai-moruk iha nasaun India, Bangladez no Indonésia mak sira hatama mai ona, atu nune’e INFPM mós bele distribui ba fasilidade saúde sira iha Timor-Leste.
“Empreza naran ha’u ladun lembra maibé iha rua, hanesan lokál no internasionál, sira-ne’e mak durante ne’e manán konkursu públiku entaun sira mak sosa,” nia haktuir.
Nia afirma, to’o agora estoke ai-moruk iha armajem sentrál sufisiente hela atu atende ba fasilidade saúde sira, tanba banhira fasilidade saúde sira estoke hahú menus sira halo ona pedidu mai nune’e bele halo distrribuisaun.
Nia relata, ba tinan 2026, INFPM sei servisu hamutuk DNFPM atu nune’e funisonamentu bele la’o ho di’ak.
“Ekipamentu mediku ba 2026, DNFPM sira hato’o ona kuantifikasaun mai. Banhira sira hato’o ona lista kuantifikasaun mai ami, entaun ami hahú loke konkursu públiku,” nia hateten.
Jornalista : Felicidade Ximenes
Editór : Cancio Ximenes
